محفل ٹور کا کراچی میں شاندار آغاز، پاکستان کے موسیقی ورثے کو خراجِ تحسین

محفل ٹور کا کراچی میں باقاعدہ آغاز 8 مئی کو آرٹس کونسل آف پاکستان میں ایک پروقار تقریب کے ذریعے کیا گیا، جہاں موسیقی، یادوں اور ثقافتی ہم آہنگی سے بھرپور ایک یادگار شام نے شائقین کو مسحور کر دیا۔ اس تقریب کی ترتیب معروف میوزک پروڈیوسر ذوالفقار جبار خان (ایکسلفی) اور شیری خطاک نے دی، جس میں ہنزہ کی روح کو پاکستان کے مقبول معاصر فنکاروں کے ساتھ یکجا کر کے ایک ایسا منفرد تجربہ پیش کیا گیا جو بیک وقت ماضی کی خوشبو اور حال کی تازگی لیے ہوئے تھا۔

لاہور میں گزشتہ برس کامیاب ڈیبیو کے بعد کراچی کا یہ کنسرٹ محفل کے 2026ء کے تین شہروں پر مشتمل دورے کا آغاز ہے، جو آئندہ مہینوں میں اسلام آباد اور لاہور تک جاری رہے گا۔ بطور ایک لائیو میوزک پلیٹ فارم، محفل مختلف موسیقی روایات، نامور فنکاروں اور ابھرتے ہوئے ٹیلنٹ کو ایک ہی اسٹیج پر جمع کر کے پاکستان کے متنوع ثقافتی ورثے کو اجاگر کرتا ہے۔

اس شام کی خاص بات ہنزہ سے تعلق رکھنے والا ایل ایل ایم سی اینسمبل تھا، جو پاکستان کا اپنی نوعیت کا پہلا مستند آرکسٹرا ہے۔ لیف لارسن میوزک سینٹر سے تربیت یافتہ یہ گروپ گلگت بلتستان اور چترال کی مقامی موسیقی کو دادنگ، چترالی ستار، ژیگینی، رباب اور بانسری جیسے روایتی سازوں کے ذریعے نہ صرف محفوظ کر رہا ہے بلکہ اسے نئے انداز میں پیش بھی کر رہا ہے۔ اس موقع پر معروف گلوکار فرحان سعید اور کال دی بینڈ نے بھی اپنی فنکارانہ صلاحیتوں کا بھرپور مظاہرہ کیا۔

کنسرٹ میں پیش کیے گئے گیتوں میں روایتی اور جدید دھنوں کا حسین امتزاج دیکھنے میں آیا، جن میں عاشرجان، یا قربان، مدھوونتی، رنجش، تو جھوم، عبدالقادر، دم مست قلندر، دھڑکے جیا اور نشان شامل تھے، جبکہ مقبول گانوں جیسے سب بھلا کے، لاری چھوٹی، پی جاؤں، خط، ہلکا ہلکا سرور اور عادت نے حاضرین کو جھومنے پر مجبور کر دیا۔ تقریب کا اختتام “قطغانی” پر ہوا، جس نے ہمنوا کے بین الثقافتی جذبے کو مزید اجاگر کیا۔

یہ کہنا بے جا نہ ہوگا کہ محفل محض ایک کنسرٹ نہیں بلکہ ایک ثقافتی تحریک ہے، جہاں پہاڑی دھنیں، جدید موسیقی اور پاکستان کی یادگار گیتوں کو ایک ہی پلیٹ فارم پر پیش کیا جاتا ہے۔ اس پروگرام نے یہ ثابت کیا کہ جب مانوس گیتوں کو مختلف علاقائی اور روایتی انداز میں پیش کیا جائے تو وہ نئی جذباتی گہرائی اختیار کر لیتے ہیں۔

اس موقع پر ایکسلفی کا کہنا تھا: “محفل کا مقصد ایک ایسا پلیٹ فارم فراہم کرنا ہے جہاں مختلف موسیقی دنیاؤں کا ملاپ ہو سکے۔ جب ایک ہی گیت کو مختلف سازوں اور ثقافتوں کے ساتھ پیش کیا جاتا ہے تو وہ نئے رنگ اختیار کر لیتا ہے، اور یہی محفل کی اصل خوبصورتی ہے۔”

واضح رہے کہ محفل، جراف پرائیویٹ لمیٹڈ کا تخلیقی منصوبہ ہے، جو ماضی میں کوک اسٹوڈیو کے کئی کامیاب سیزنز بھی پیش کر چکی ہے۔ اس ٹور کو جراف پرائیویٹ لمیٹڈ اور ہم نیٹ ورک کے اشتراک سے “کارواں میوزک (پرائیویٹ) لمیٹڈ” کے تحت پیش کیا جا رہا ہے، جبکہ آغا خان کلچرل سروسز پاکستان نے ایل ایل ایم سی اینسمبل کو اس پلیٹ فارم تک لانے میں اہم کردار ادا کیا ہے۔

کراچی میں کامیاب آغاز کے ساتھ ہی محفل ٹور نے ایک ایسے سفر کی بنیاد رکھ دی ہے جو ثقافتی ورثے کے تحفظ، اس کی نئی تشریح اور اجتماعی یادداشت کو تازہ کرنے کا ذریعہ بنے گا، اور موسیقی کو ایک زندہ، ارتقا پذیر اور دل کو چھو لینے والا تجربہ بنا کر پیش کرے گا۔