وائرل ویڈیوز سے کوئی تعلق نہیں،قانونی چارہ جوئی کروں گا۔ملک ریاض

اداکارہ عظمی خان اور ان کی بہن ہما خان کے گھر میں تشدد اور ہراساں کرنے کی وائرل ویڈیوز پر پاکستان کے مشہور و معروف بزنس مین ملک ریاض نے سرے سے تمام معاملے سے اظہار لاتعلقی کا اعلان کرتے ہوئے کہا کہ ان کو معاملے سے نہ جوڑا جائے، عثمان ملک میرا بھانجا نہیں ہے۔

تفصیلات کے مطابق ٹوئٹر کا سہارا لیتے ہوئے، وائرل شدہ ویڈیوز پر ملک ریاض کا کہنا تھا کہ میں انتہائی حیرت زدہ ہوں کہ مجھے محض بدنام کرنے کے لیے یہ ایک انتہائی گری ہوئی اور چھوٹی حرکت ہے۔ مجھے ایسے معاملے سے جوڑا جارہا ہے جس سے میرا کوئی لینا اور دینا ہی نہیں ہے۔

اس حوالے سے انہوں نے مزید کہا کہ اگر اس جھوٹے اور گھٹیا معاملے سے اب مجھے کسی نے بھی جوڑنے کی کوشش کی تو وہ ان سب لوگوں کے خلاف قانونی کارروائی کرتے ہوئے ہتک عزت کا دعویٰ کریں گے۔

یاد رہے گزشتہ کئی دن سے انٹرنیٹ پر کچھ ویڈیوز وائرل تھیں جن میں دیکھا گیا تھا کہ دو خواتین کو ان کے گھر میں تشدد اور حراساں کیا جارہا ہے۔ جبکہ تشدد کرنے والی بھی خواتین تھیں البتہ ان کے ساتھ کئی گارڈز بھی موجود تھے۔ بعدازاں یہ بات کھل سامنے آئی کہ نہ مارنے والے عام لوگ تھے اور نا ہی مار کھانے والے۔ تشدد اورہراساں ہونے والی خواتین میں شہور اداکارہ عظمیٰ خان اور ان کی بہن ہما خان شامل تھیں۔

اس واقعہ نے مزید اس وقت اور زور پکڑا جب عظمی خان نے اپنے ٹوئیٹر اکاؤنٹ کے ذریعے الزام عائد کئے کہ تشدد کرنے والی خواتین مشہور بزنس مین ملک ریاض کی بیٹیاں(امبرین ملک اور پشیمانہ ملک) ہیں۔ انہوں نے مزید لکھا کہ انہوں نے پاکستان کے طاقتور ترین لوگوں سے جنگ کی ہے اب وہ یا جیتیں گی یا قتل کردی جائیں گی لیکن پیچھے نہیں ہٹیں گی۔ جبکہ پولیس سے درخواست بھی کی کہ ان کا میڈیکل کروایا جائے اس سے قبل ان کے زخم بہتری کی طرف چلے جائیں ۔