جاپانی پھل املوک کھانے میں مزیدار اور فوائد بےشمار

نارنجی رنگ کا جاپانی پھل “املوک “دیکھنے میں بہت خوش نما نظر آتا ہے اور اس کی شکل ٹماٹر سے ملتی جلتی ہوتی ہے لیکن اس کی رنگت ٹماٹر سے مختلف ہوتی ہے۔ انگلش میں اس پھل کو پرسیمن کہا جاتا ہے۔
اس پھل کے ذائقے کی بات کریں تو یہ کھانے میں ترش اور مزیدار ہوتا ہے۔ اس کا گودا نہایت نرم ہوتا ہے، چاہیں چمچ سے اس کا صرف گودا کھائیں یا اسے چھلکے سمیت کھائیں دونوں ہی صورتوں میں یہ نہایت فائدے مند ہے۔

پاکستان میں اس کو جاپان سے درآمد کیا گیا ہے اسی لئے اس پھل کو زیادہ تر لوگ جاپانی پھل کہتے ہیں۔ یہ پھل موسم سرما کی سوغات ہے اور اسے اب پاکستان کے کچھ علاقوں میں بڑی کامیابی سے کاشت کیا جارہا ہے جن میں کشمیر اور سوات کے علاقے بھی شامل ہیں۔

املوک گرم مزاج پھل ہے اس لئے اس کو اعتدال میں کھانا چاہئیے۔ اس کا ذائقہ تھوڑا ترش ہوتا ہے جس کی وجہ سے بہت سے لوگ اسے کھانا پسند نہیں کرتے ہیں۔ لیکن قدرت کے اس خاص پھل کو ضائع نہ کریں، بلکہ اپنی غذا میں شامل کریں۔کیونکہ املوک ایک ایسا پھل ہے جس کے فائدے ہی فائدہ ہیں۔ اس پھل میں وافر مقدار میں وٹامن اے،بی اور ای ،کیلشیم، فاسفورس، آئرن اور پوٹاشیم پایا جاتا ہے۔

املوک کے فوائد کی بات کریں تو یہ قبض کشا خصوصیات کی وجہ سے ان لوگوں کے لیے بہترین ہے جو قبض میں مبتلا رہتے ہیں یا جگر کے مسائل کا شکار ہیں۔ یہ معدے کی خرابیوں کو دور کرتا ہے۔ اس میں فائبر موجود ہے جو نظام ہاضمہ کو بہتر رکھتا ہے۔جاپانی پھل میں موجود مختلف غذائی اجزاء دل کی صحت کے لیے مفید ہیں۔ یہ بلڈ پریشر اور شوگر کو بھی کنٹرول کرتا ہے۔

ایک تحقیق کے مطابق یہ پھل برین ٹیومر کا خطرہ کم کرنے میں مددگار ہے اور اپینڈکس کے مریضوں کے لئے بھی اسکا کھانا مفید ہے۔

املوک ذائقے میں ترش ہوتا ہے لیکن گلے کی سوزش اور خراش میں فائدہ مند ثابت ہوتا ہے۔یہ پٹھوں کی اکڑن اور کمر درد میں مفید ہے۔ یہ کمزور بینائی کو بہتر بنانے میں مدد دیتا ہے۔ یہ ذہنی دباؤ اور سستی کے اثرات کو بھی ختم کرتا ہے۔ اس کا روزمرہ استعمال قوت معدافعت میں اضافہ کا سبب بنتا ہے۔ کھیل کود یا جسمانی سرگرمیوں میں حصہ لینے والوں کے لئے یہ پھل بہترین ٹانک کا کام دیتا ہے۔

مزید یہ کہ اگر آپ اپنے بڑھتے ہوئے وزن اور ڈھلتی عمر سے پریشان ہیں تو ان مسائل سے نمٹنے کے لئے یہ پھل اپنی غذا میں شامل کرلیں کیونکہ اس کے چھلکے میں قدرتی طور پر بڑھتی ہوئی عمر کے اثرات سے بچانے کی صلاحیت ہوتی ہے جبکہ اس کا استعمال وزن میں کمی کا باعث بھی بنتا ہے۔