اسلامی تاریخ میں پہلی بار حجاج ِاکرام کے لیے ایک ہی میقات مقرر

کررونا کی وباء کے باعث سعودی حکومت کے فیصلے کے مطابق اسلامی تاریخ میں پہلی بار حج کی نیت سے مکہ مکرمہ میں داخلے کا اہتمام ایک ہی میقات سے کیا گیا ہے۔

میقات ایک اصطلاح ہے جس کا مطلب وہ حد ہے جہاں سے عازمین کو حج یا عمرہ کی نیت سے لازمی طور پر احرام کی حالت میں گزرنا ہوتا ہے۔ لیکن عالمی وباء کورونا وائرس کی وجہ سے جہاں محدود پیمانے پر عازمین کو حج بیت اللہ کی اجازت دی گئی ہے وہیں حج کے ارکان کے حوالے سے ہونے والے اقدامات تاریخ کا حصہ بن رہے ہیں۔

رپورٹ کے مطابق اس سال عازمین حج کو صرف ایک ہی میقات سے گزرنا ہوگا۔ یہ میقات قرن المنازل مکہ مکرمہ کا قریبی میقات ہے۔ یہ میقات طائف کے قریبی علاقے السیل الکبیر میں واقع ہے اور اس میقات کا نام قرن المنازل ہے۔

نبی کریم صلی اللہ علیہ وآلہ سلم نے حج اور عمرہ ادا کرنےکے لیے دنیا کے مختلف علاقوں سے آنے والوں کے لیے چار میقات متعین کی تھیں۔ پانچویں میقات کے بارے میں بعض جگہوں پر وضاحت ملتی ہے کہ رسول کریم صلی اللہ علیہ وآلہ وسلم نے پانچویں میقات کا بھی تعین کیا تھا لیکن بعض روایات میں پانچویں میقات کا انتخاب اسلام کے دوسرے خلیفہ حضرت عمر فاروق رضی اللہ تعالی عنہ نے کیا تھا۔

مکہ کی جانب سفر کے لیے مختلف سمت سے یہ پانچ حدود یا میقات حج یا عمرہ کی حالت کی نمائندگی کرتی ہیں۔ مکہ مکرمہ کے شمال مشرق میں طائف کے قریب واقع میقات قرن المنازل مورخین نے نجد کے لوگوں کا میقات کہا ہے۔ عموما ًخلیجی ممالک اور مشرقی ایشیاء سے آنے والے زائرین کے لئے یہی میقات ہے۔ اس میقات پر قائم السیل الکبیر مسجد عازمین کے لئے جدید خدمات سے آراستہ ہے۔

دنیا بھر میں پھیلی عالمی وباء کورونا وائرس کی وجہ سے اپنائے جانے والے غیر معمولی حالات کے پیشِ نظر رواں سال حج کی ادائیگی مختلف ہوگی کیونکہ سعودی حکومت نےاس سال حج ادا کرنے کی اجازت بھی صرف سعودی عرب میں مقیم حجاج ِاکرام کو دی ہے جن کی انتہائی محدود تعداد تقریباً 1000 رکھی گئی ہے۔ یہی وجہ ہے کہ اس سال حج کی نیت سے مکہ مکرمہ میں داخلے کا اہتمام ایک ہی میقات سے کیا گیا ہے۔ درحقیقت ان اقدامات کے ذریعے ادائیگی ِحج کے دوران سعودی حکومت عالمی وباء کے پھیلاؤ کی روک تھام کو یقینی بناسکے گی۔