بدترین لوڈشیڈنگ معاہدے کی خلاف ورزی ہے،اسد عمر کی کےالیکڑک کو وارننگ

وفاقی وزیر برائے منصوبہ بندی اسد عمر نے ایک بار پھر کے الیکڑک کی جانب سے غیر اعلانیہ لوڈشیڈنگ پر کے الیکڑک انتطامیہ کو وارننگ دیتے ہوئے کہہ دیا کہ اگر کے الیکٹرک اپنی انتظامیہ ذمہ داریاں پوری نہیں کرے گی تو نیپرا پھر کاروائی کرے گی۔

کراچی میں ایک بار پھر سے غیر اعلانیہ لوڈشیڈنگ کے آغاز پر وفاقی وزیر برائے منصوبہ بندی اسد عمر کا کہنا ہے کہ کے الیکڑک کی پرائیویٹائزیشن ہوئی ہے، اس کا ہرگز یہ مطلب نہیں ہے کہ کراچی کی پرائیویٹائزیشن ہوگئی ہے۔ اسد عمر نے مزید کہا کہ ایسا ہو نہیں سکتا کہ کراچی کے شہریوں کی جائز ضروریات پوری نہ ہوں اور وفاقی حکومت دیکھتی رہے۔ کے الیکڑک اپنی ذمہ داریاں پوری کرے وارنہ نیپرا ہر ممکن کاروائی کرے گا۔

وفاقی وزیر اسد عمر کا اس حوالے سے مزید کہنا تھا کہ کے الیکڑک کی جانب سے کتنی مقدار تیل اور گیس کی مانگی جارہی تھی وہ سب اب دی جارہی ہے، ان سب کے باوجود کے الیکڑک کی جانب سے لوڈشیڈنگ ہونا معاہدے کی خلاف ورزی ہے۔ اب وفاق کی ذمہ داری ہے اور وفاق اب ہر ممکن اقدامات کرے گا، جو بھی قانون کے اندر طاقت ہے وہ سب استعمال کی جائے گی۔ ساتھ ہی اسد عمر نے یہ بھی کہا ہے کہ اگر نیپرا کو کسی بھی قسم کی مدد چاہیے اپنے اقدامات کو عمل درآمد کروانے کے لئے تو وفاق حاضر پے۔

دوسری جانب وفاقی وزیر اسد عمر نے یہ بھی باور کرایا کہ کراچی شہر کی ذمہ داری وفاقی حکومت کی ہے، کے الیکڑک اور نیپرا محض ادارے ہیں اور اگر ادارے کام نہیں کریں تو حکومت ہر ممکن اقدامات آوٹھائے گی۔

یاد رہے کہ 11 جولائی کو گورنر ہاؤس میں گورنر سندھ عمران اسماعیل کی سربراہی میں کراچی میں طویل لوڈشیڈنگ اور بجلی بحران سے متعلق اجلاس ہوا تھا، جس میں وفاقی وزیر منصوبہ بندی اسد عمر، چئیرمین نیپرا اور کے الیکڑک کی اعلیٰ انتظامیہ شریک ہوئی تھی۔ اجلاس میں کے الیکڑک کو گیس اور آئل کی فراہمی بڑھانے کا فیصلہ ہوا تھا۔ اجلاس کے بعد گورنر سندھ عمران اسماعیل اور وفاقی وزیر اسد عمر نے اعلان کیا تھا کہ کراچی میں آج کے بعد سے غیر اعلانیہ لوڈشیڈنگ نہیں کی جائے گی۔

تاہم اس اعلان کے ایک روز کے بعد ہی کراچی شہر میں بدترین لوڈشیڈنگ کا سلسلہ جاری رہا، جس کے بعد وفاقی وزیر اسد عمر نے ایک بار پھر الیکڑک کو وارننگ جاری کردی ہے۔