سوشل میڈیا پر شہریار منور اور سائرہ یوسف کی تعریفیں

پاک فوج کے شعبہ تعلقات عامہ (آئی ایس پی آر) کے تعاون سے بنائے گئے فوجی ڈراما ’صنف آہن‘ جس کی ہدایت کاری ندیم بیگ نے کی ہے جبکہ اسے پروڈیوس ہمایوں سعید کی اہلیہ ثمینہ سعید اور ثنا شاہنواز نے کیا ہے کی اب تک ایک درجن سے زائد قسطیں آن ائیر کی جاچکی ہیں۔ اس ڈرامے میں سجل علی، یمنیٰ زیدی، سائرہ یوسف، کبریٰ خان اور رمشا خان فوجی افسر کا کردار ادا کر رہی ہیں۔ یہ ڈرامہ اپنے آغاز سے ہی لوگوں میں مقبول ہے اور اب جوں جوں اس کی کہانی آگے بڑھ رہی ہے، ویسے ویسے اس کی مقبولیت میں مزید اضافہ ہورہا ہے۔

حال ہی میں اس ڈرامے کی 19 ویں قسط کے ایک سین کی کلپ سوشل میڈیا پر وائرل ہوئی ہے جس میں شہریار منور اور سائرہ یوسف کی تعریفیں کی جارہی ہے۔ اس کلپ میں سائرہ یوسف کو اپنے سابق بوائے فرینڈ کو بلاکر ان سے موبائل مانگتے ہوئے دکھایا گیا ہے۔

اس سین میں دکھایا گیا ہے کہ سائرہ یوسف فوج میں جانے کے بعد بوائے فرینڈ کی جانب سے تصویر وائرل کیے جانے پر ان سے تعلقات ختم کردیتی ہیں اور ان سے موبائل مانگتی ہیں، تاکہ وہ اس میں موجود اپنی تمام تصاویر ڈیلیٹ کردیں۔

مذکورہ سین میں سائرہ یوسف اپنے بوائے فرینڈ کو بتاتی ہیں کہ فوج میں جانے اور وردی پہننے کے بعد ان کی اہمیت تبدیل ہوگئی ہے اور اب وہ پہلے جیسی غیر اہم نہیں رہیں۔سائرہ یوسف کے ایسے روئیے پر ان کے بوائے فرینڈ ان کے ساتھ نامناسب لہجے میں بات کرتے ہوئے انہیں یاد دلاتے ہیں کہ فوجی وردی پہننے سے ان کی اہمیت تبدیل نہیں ہوئی اور وہ ان کے لیے ویسی ہی ہیں، جس پر بوائے فرینڈ انہیں موبائل دینے سے انکار کرنے کے بعد اٹھ کر چلے جاتے ہیں۔

بوائے فرینڈ کی جانب سے موبائل فون نہ دئیے جانے پر وہاں اچانک شہریار منور آجاتے ہیں جو کہ ڈرامے میں کیپٹن کا کردار ادا کررہے ہیں، ان کے سخت لہجے اور سمجھانے کے بعد سائرہ یوسف کے سابق بوائے فرینڈ خوف زدہ ہوجاتے ہیں اور شہریار منور کو اپنا موبائل دے دیتے ہیں۔

مزید پڑھیں : سائرہ اور صدف کنول دونوں ہی ہماری بیٹیاں ہیں، بہروز سبزواری

ڈرامے کے اس سین میں بوائے فرینڈ کی بلیک میلنگ، اس کے نامناسب روئیے، سائرہ یوسف کی جانب سے فوجی وردی پہننے کے بعد اپنی اہمیت تبدیل ہوجانے اور شہریار منور کی جانب سے دبنگ اور ذمہ دارانہ انداز کو دکھانے پر اداکاروں کی تعریفیں کی جارہی ہیں۔

سماجی رابطے کی ویب سائٹ ٹوئٹر پر متعدد سوشل میڈیا صارفین نے سائرہ یوسف اور شہریار منور کی تصاویر شیئر کرتے ہوئے دونوں کی اداکاری کو سراہا اور لکھا کہ ایسے ہی مناظر کو پاکستانی ٹی وی پر دکھانے کی ضرورت ہے۔ اس سین پر جہاں لوگوں نے شہریار منور کی اداکاری کو سراہا، وہیں بعض لوگوں نے سائرہ یوسف کے بوائے کے کردار نوروز کی حالت پر بھی افسوس کا اظہار کیا ہے۔

خیال رہے کہ گزشتہ دنوں سائرہ یوسف نے ایک ویب چینل کو انٹرویو دیا جس میں انہوں نے اپنے کیرئیر ، سابقہ شوہر اور اپنی بیٹی نورے سے متعلق بات چیت کی۔ اس انٹرویو میں میزبان نے سائرہ یوسف اور شہروز سبزواری کی طلاق اور بیٹی کی پرورش کے حوالے سے ان سے سوال کیا کہ آپ کو بحیثیت سنگل پیرنٹ کن چیلیجز کا سامنا ہے؟ جواب میں اداکارہ کا کہنا تھا کہ میرے لیے سنگل پیرنٹ ہونا زیادہ چیلنجنگ نہیں ہے کیونکہ شہروز اور ان کی فیملی مجھے سپورٹ کرتے ہیں۔ انہوں نے بتایا کہ ان دونوں نے اس بات کو یقینی بنایا کہ ہم اپنی بیٹی کی مل کر پیرنٹنگ کریں گے۔اداکارہ نے بتایا کہ نورے کو اپنے والد کی کمی محسوس نہیں ہوتی کہ کیونکہ شہروز اور اس کے دادا دادی اس کا بہت خیال رکھتے ہیں۔