کترینہ کیف اور وکی کوشل کی شادی سے متعلق دلچسپ تفصیلات

بالآخر بھارتی اداکارہ کترینہ کیف اور اداکار وکی کوشل باضابطہ طور پر شادی کے بندھن میں بندھ گئے ۔بالی ووڈ کی اس معروف جوڑی کی شادی میں مداحوں کی دلچسپی کے باعث شادی کی تقریبات ہوتے ہی دلچسپ تفصیلات سامنے آنا شروع ہوگئی ہیں۔

خوبصورتی میں بے مثال کترینہ کیف جن کے مداحوں کی تعداد کڑوڑوں میں ہے، ان کی شادی کا سبھی کو بےصبری سے انتظار تھا یہی وجہ ہے کہ ان کی شادی کے ‘اعلان’ کے بعد سے سوشل میڈیا پر کترینہ وکی کی شادی زیر موضوع رہی۔ اب یہ شادی ہوجانے کے بعد اس جوڑے کی شادی کی انگوٹھیوں کی قیمت سے لے کر منڈپ میں پھیرے لینے تک کی تمام اہم تفصیلات سامنے آگئی ہیں۔ بھارتی میڈیا کے مطابق یہ شاہانہ شادی جے پور کے 6 سینس فورٹ ہوٹل میں منعقد ہوئی۔

اس رپورٹ میں بتایا گیا ہے کہ وکی کوشل اور کترینہ کی شادی کی انگوٹھیوں کے لیے معروف امریکی برانڈ ٹفنی کا انتخاب کیا۔ کترینہ کو شادی پر نیلے رنگ کی پلاٹینم کی انگوٹھی پہنے ہوئے دیکھا جاسکتا ہے، جس کے گرد ہیرے جڑےہوئے ہیں اور اس کی مالیت 7.4 لاکھ بھارتی روپے ہے۔ جبکہ وکی کوشل کی شادی کی انگوٹھی کا انتخاب ٹفنی کی کلاسک کلیکشن سے کیا گیا ہے، جس کی قیمت 2 .1 لاکھ بھارتی روپے ہے۔

جبکہ اس جوڑے نے روایتی ہندو رسومات کے مطابق شادی کی اور 9 دسمبر کی دوپہر کو 7 پھیرے لئے۔ دولہا اور دلہن کی شادی کے منڈپ کو اس طرح ترتیب دیا گیا تھا کہ اس کا رخ مندر کی طرف ہو۔کترینہ پھولوں سے مزین خوبصورت ڈولی پر بیٹھ کر منڈپ پہنچیں جبکہ دولہا وکی کوشل اپنی سہرا بندی کے بعد ونٹیج کار میں آئے۔ رپورٹ میں یہ بھی انکشاف کیا گیا ہے کہ پیلے، نارنجی اور گلابی رنگوں سے سجامنڈپ قلعے کے شیش محل کے درمیان میں بنایا گیا تھا اور اس کے سامنے ایک مندر تھا۔

البتہ شادی سے پہلے سنگیت کی تقریب میں دولہا دلہن نے گانوں پر پرفارم کیا جبکہ شادی میں شریک مہمان دولہا اور دلہن کی پرفارمنس سے خوب لطف اندوز ہوئے۔ نوبیاہتا جوڑے نے اپنے سنگیت پر 4.5 لاکھ روپے کا کیک بنوایا تھا۔ کترینہ اور وکی کا سنگیت کیک دہلی کے ایک مشہور شیف نے بنایا تھااور اسے بیریز سے سجایا گیا تھا۔

دولہا دلہن نے ہر ممکن کوشش کی اپنی شادی کی تقریبات کو میڈیا سے دور رکھیں اس لئے شادی کی تقریبات میں شریک مہمانوں کو بھی موبائل فون کے استعمال کی اجازت نہیں تھی۔ ان پابندیوں کے باوجود بھی کترینہ اور وکی کی شادی کی تقریب کے اندرونی مناظر لیک ہو گئے۔

علاوہ ازیں ، بھارتی میڈیا پر یہ بات بھی سامنے آئی ہے کہ کترینہ اور وکی نے اپنی شادی کی فوٹیج اسٹریمنگ سروس ایمازون پرائم کو 800 ملین روپے میں فروخت کی گئی ہے۔ تاہم اس بات کی تصدیق ان کے یا ان کے نمائندوں نے نہیں کی ہے۔