معروف گلوکار بلال سعید کی اپنے بھائی سے جھگڑے کی ویڈیو وائرل

لاہور میں معروف گلوکار بلال سعید کےبھائی اور بھابی سے نجی معاملے پر لڑائی جھگڑے کی فوٹیج منظر عام پر آگئی، دونوں بھائیوں کے مابین اس لڑائی کے دوران موقع پر موجود ڈولفن اہلکار بیچ بچاؤ کراتے رہے۔

سوشل میڈیا پر وائرل ہونے والی اس ویڈیو میں مشہور گلوکار بلال سعید نے اپنی رہائش گاہ کے سامنے غصؔے کی حالت میں اپنے بھائی اور بھابی پر لاتوں اور گھونسوں کی بوچھاڑ کردی۔ اس واقعے کی موبائل فوٹیج میں بلال سعید کو ڈولفن اہلکاروں کی موجودگی میں اپنے بھائی بھابی پر تشدد کرتے دیکھا جاسکتا ہے۔

جیو نیوز کے مطابق یہ واقعہ 10 جنوری کو تھانہ سندر کی حدود میں پیش آیا تھا۔ بلال سعید کی جانب سے کارروائی کیلئے تھانہ سندر میں درخواست دی گئی تھی، بعدازاں گلوکار اور ان کے بھائی کے درمیان صلح بھی ہوچکی ہے۔

یہ ویڈیو وائرل ہونے کے بعد پاکستانی سوشل میڈیا صارفین کے درمیان موضوع بحث بنی ہوئی ہے اس وقت بھی بلال سعید کا نام ٹاپ ٹرینڈز میں شامل ہے
۔

صارفین کی جانب سے خاتون کے ساتھ ہاتھا پائی پر گلوکار کو تنقید کا نشانہ بنایا جارہا ہے۔ تاہم اس معاملے پر بلال سعید کا مؤقف بھی سامنے آگیا، انہوں نے اس معاملے پر اپنی فیس بک پوسٹ میں لکھا ہے کہ میں اچھے سے جانتا ہوں کہ ایک خاتون کی عزت کیسی کی جاتی ہےاور یہ بھی جانتا ہوں کہ اس کا تحفظ کیسے کیا جاتا ہے۔ میں نےجو کچھ کیا ہے اپنے گھر کے تحفظ کے لئے کیا ہے کیونکہ میری غیر موجودگی میں میرے گھر میں گھس کر توڑ پھوڑ کی گئی۔ انہوں نے اپنی پوسٹ میں مزید لکھا ہے کہ میں بہت عرصے سے ان لوگوں کی بلیک میلنگ اور غیر منصفانہ سلوک برداشت کر رہا ہوں۔ اب تک میں خاموش رہا کیوں کہ ظاہر ہے کہ بطور آرٹسٹ میری ترجیح میرا پیشہ ہے لیکن یہ لوگ میرے آرٹسٹ ہونے کا فائدہ اٹھاتے رہے ہیں۔ گلوکار کا یہ بھی کہنا ہے کہ میرے بھائی نے بہت بدتمیزی کی تھی جس پر جھگڑا ہوا، یہ میرا نجی مسئلہ تھا جو حل ہوچکا ہے۔

واضح رہے کچھ عرصہ قبل بھی بلال سعید اپنی میوزک ویڈیو “قبول ہے”کو لاہور کی تاریخی مسجد وزیر خان میں شوٹ کرنے پر سوشل میڈیا پر زیر بحث رہے۔ یاد رہے کہ گانے کی ریلیز سے قبل تشہیر کے لیے صبا قمر اور بلال سعید نے چند تصاویر اور ایک ٹیزر شیئر کیا تھا جس پر متعدد لوگوں نے مسجد وزیر خان میں عکس بندی اور رقص کرنے پر اعتراض کیا اور کارروائی کا مطالبہ کیا تھا پھر دونوں فنکاروں کی جانب سے عوام سے معافی مانگ لی گئی تھی۔