بھارتی ٹینس اسٹار ثانیہ مرزا بھی پاکستانی ڈراموں کی شوقین نکلیں

جب بات آتی ہے تفریح کی تو آج کے دور میں انٹرٹینمنٹ کا سب سے بڑا ذریعہ ٹی وی چینلز کو مانا جاسکتا ہے اور اس شعبے میں سب سے زیادہ اہمیت ڈراموں کی ہے جس میں ہمارے معاشرے کے مختلف رنگوں کی کہانیاں دلچسپ انداز میں پیش کی جاتی ہیں۔

اس میں کوئی شک نہیں کہ پاکستانی ڈرامے اپنے بہترین اسکرپٹ اور کہانی کی وجہ سی پوری دنیا میں مقبول ہیں اور لوگ انہیں بہت بڑے شوق سے دیکھتے ہیں۔ پڑوسی ملک بھارت میں بھی پاکستانی ڈرامے بڑے ذوق و شوق سے دیکھے جاتے ہیں بلکہ یوں کہنا بجا ہوگا کہ ڈرامہ نگاری سے لے کر اس کے آن ائیر ہونے تک پاکستانی انڈسٹری اپنے پڑوسی ملک سے بہت آگے ہے ۔

حال ہی میں قومی کرکٹر شعیب ملک کی اہلیہ اور ہندوستانی ٹینس اسٹار ثانیہ مرزا نے سوشل میڈیا پر ایک پوسٹ شئیر کی ہے جس سے معلوم ہوتا ہے کہ وہ بھی پاکستانی ڈراموں کی دلدادہ ہیں اور فارغ اوقات میں پاکستانی ڈرامے دیکھنا پسند کرتی ہیں۔

دبئی میں مقیم ٹینس اسٹار ثانیہ مرزا نے گذشتہ روز مداحوں کے لئے اپنے انسٹاگرام اکاؤنٹ کی اسٹوری میں ایک تصویر شیئر کی جس میں وہ اپنے ہاتھ میں چائے کا کپ تھامے ہوئے ہیں اور پاکستانی ڈرامہ “میرا دل میرا دشمن “سے لطف اندوز ہو رہی ہیں۔ اپنی انسٹاگرام اسٹوری میں انہوں نے مزید لکھا کہ بچے کے سونے کے بعد ایک کپ چیمو مائل چائے اور ہیش ٹیگ کے ساتھ ڈرامہ میرا دل میرا دشمن کا نام لکھا ہے تاکہ لوگوں کو معلوم ہوجائے کہ وہ آج کل کون سا ڈرامہ دیکھنا پسند کررہی ہیں۔

واضح رہے کہ پاکستانی چینل اے آر وائی ڈیجیٹل پر نشر کیے جانے والے ڈرامے “میرا دل میرا دشمن “میں اداکارہ علیزے شاہ، ادکار و ہدایتکار یاسر نواز، اداکار نعمان سمیع کی جاندار اداکاری نے ڈرامے میں چار چاند لگا دئیے اور پاکستان میں بھی مداحوں کی جانب سے اس ڈرامے کو بھرپور پذیرائی ملی ہے۔

اس حوالے سے یہ بتاتے چلیں کہ پاکستانی ڈراموں کی مقبولیت کو پیش نظر رکھتے ہوئے ہندوستانی ٹی وی “زی زندگی “نے پاکستانی نجی ٹی وی چینل جیو ٹی وی کے بہت سے ڈرامے نشر کیے ہیں۔ ان ڈراموں میں میری زندگی ہے تو ، دل محلےکی حویلی، نم اور مورے پیا شامل ہیں اور ان ڈراموں نے ہندوستان میں بےپناہ شہرت پائی ہے۔

پاکستانی ڈرامہ سیریل انڈیا کےمقامی ٹی وی چینل پر دکھائے جانے کے بارے میں لوگوں کی رائے یہ تھی کہ پاکستانی ڈرامے بہت اچھے اور مہذبانہ ہیں اور وہ یہ ڈرامے دیکھ کر بہت محظوظ ہوئے ہیں۔