ایک تصویر سے شہرت حاصل کرنے والا چائے والا آج کہاں ہے؟

اگر قسمت کو رات ہی رات بدلتے دیکھنے کی کوئی حقیقی مثال سوچی جائے تو شاید ہمارے زہنوں میں کئی سارے نام آئینگے، ان ہی کئی ناموں میں ایک نام اسلام آباد میں چائے بیچنے والے ارشد کا نام بھی ہے، جس کی ایک تصویر سوشل پر ایسی وائرل ہوئی جس نے اس کی زندگی بدل کر رکھ دی ، البتہ اب ارشد چائے والا ایک بار پھر خبروں کی زینت بنے ہوئے ہیں لیکن اس بار خبر ہے کہ چائے والے کے نام سے شہرت حاصل کرنے والے ارشد نے اسلام آباد میں ایک ماڈرن اور نئے طرز کا چائے کیفے کھول لیا ہے۔

اگر اس قصے کی تفصیل کی بات کی جائے تو چائے بیچنے والے ارشد کو تو شاید وہم وگمان میں نہیں ہوگا کہ اس کو اللہ تعالیٰ نے کس قدر خوبصورتی سے نوازا ہوا ہے، یہ سال 2016 ستمبر کے مہینے کی بات ہے ارشد اسلام آباد کے ایک اتوار بازار میں چائے بیچا کرتا، وہ تقریباً چار سال سے اس کام سے وابستہ ہے۔ شاید وہ ارشد کی زندگی بدلنے کے لمحات چل رہے تھے جہاں ایک خاتون فوٹوگرافر نے ارشد کی چائے بناتے ہوئے تصویر لی اور اسے انسٹاگرام پر “ہوٹ ٹی” کے نام سے شئیر کردیا اور بس یہاں سے ارشد کی زندگی مکمل طور پر تبدیل ہوگئی۔

تصویر ابھی وائرل ہی ہوئی تھی کہ عوام میں ارشد کی مقبولیت بڑھتی گئی وہیں دوسری جانب ماڈلنگ ایجنسیوں نے بھی ارشد کی تلاش شروع کردی۔ بعدازاں ارشد نے ماڈلنگ اور اداکاری کے لئے آفریں آنا شروع ہوگئیں۔ تاہم ایک مارننگ شو میں ارشد کی جانب سے اپنے آنے والے وقتوں کے پروگراموں کے حوالے سے بات کرتے ہوئے ان کا کہنا تھا کہ وہ آگے چل کر اپنا خود کا چائے ہوٹل کھولنا چاہتے ہیں۔ کیونکہ تصاویر وائرل ہونے سے قبل ارشد جہاں چائے بیچا کرتا تھا وہاں وہ بطور ملازم کام کرتا تھا، لہذا اس کا ابتداء سے ارادہ تھا کہ وہ اس کاروبار کا حصہ بنے۔

لہذا اس ہی سلسلے کے تحت ارشد خان عرف چائے والے نے اسلام آباد میں اپنا ایک ذاتی چائے کا کیفے کھول لیا، اس کیفے کو نہایت ہی پُرکشش انداز میں ڈھالا گیا ہے، پاکستانی کلچر کے خوبصورت رنگ واضح طور پر دیکھائی دیتے ہیں جبکہ اس کیفے کا نام “چائے والا کیفے” رکھا گیا ہے، جس پر اردو نیوز کے نمائندے سے بات کرتے ہوئے ارشد نے بتایا کہ جب وہ یہ کیفے کھول رہا تھا تو لوگوں نے اسے منہ کیا کہ وہ یہ نام نہ رکھے تاہم ارشد خان کا کہنا ہے کہ چائے والا میری پہچان ہے تو وہ اسے کیوں ہٹائے۔

اس حوالے سے ارشد خان کا مزید کہنا تھا کہ اس کیفے میں چائے کے علاوہ 15 سے 20 قسم کی ڈیشیز دستیاب ہیں، ساتھ ہی ساتھ ان کا یہ بھی کہنا تھا کہ اس کیفے کو چلانا اس وقت ان کے لئے بہت اہمیت کا حامل ہے، وہ اپنی دیگر مصروفیات کو کم کرکے اس کیفے پر زیادہ دہان دے رہے ہیں کیونکہ اس کیفے کے ساتھ ان کا نام جوڑا ہوا ہے۔

دوسری جانب اپنے ایکٹنگ کیرئیر کے حوالے سے بات کرتے ہوئے ارشد خان کا کہنا تھا کہ جلد ہی ان کے دو، چار ٹی وی پروگرام کی اقساط نشر ہونگی، لہذا وہ آگے چل کر ایکٹنگ کو بھی مزید وقت دیں گے۔

ارشد خان نے تعلیم کے حوالے سے بات کرتے ہوئے کہا کہ لوگ اکثر کہتے ہیں تعلیم بہت ضروری ہے، اگرچہ انہوں نے کسی بھی قسم کی کوئی تعلیم حاصل نہیں کی ہے لیکن پھر بھی اللہ تعالیٰ نے انھیں نوازا ہے، لیکن مجھے آج افسوس ہے کہ میں نے تعلیم حاصل کیوں نہیں کی، لہذا اس ہی وجہ سے انہوں نے اب فیصلہ کیا ہے کہ وہ ایک ایسا ادارہ قائم کریں گے جہاں ان بچوں کو بالکل مفت تعلیم دی جائے گی جن کے والدین تعلیمی اخراجات نہیں اوٹھا سکتے ہیں۔ ساتھ ہی ساتھ اس دوران انھیں کچھ ہنر بھی سیکھائے جائینگے جو ان کی آگے کی زندگی میں کام آسکیں۔

Courtesy: Urdu News