اداکارہ ثناء نے شادی کے 14 سال بعد شوہر سے علیحدگی کا اعلان کردیا

پاکستان کی معروف جوڑی اداکارہ ثناء اور فخر امام کے درمیان شادی کے 14 سال بعد علیحدگی ہوگئی ہے۔ اس بات کا اعلان ثناء نے سوشل میڈیا پوسٹ میں کیا۔

فوٹو اور ویڈیو شیئرنگ پلیٹ فارم انسٹاگرام پر پوسٹ شیئر کرتے ہوئے اداکارہ کا کہنا تھا کہ ’رشتہ ٹوٹنا تکلیف دہ ہوتا ہے لیکن کبھی کبھی رشتہ توڑنا اس وجہ سے ضروری ہوتا ہے کہ آپ خود کو ٹوٹنے سے بچا لیں۔ میں نے اور فخر نے شادی کے کئی اچھے اور برے سالوں بعد اپنی راہیں جدا کرلی ہیں’۔

اس موقع پر اداکارہ ثناء نے مزید کہا کہ ’یہ دل توڑ دینے والا کام ہے لیکن مجھے پورا یقین ہے کہ خدا نے ہمارے لیے کچھ اچھا سوچا ہوگا۔ فخر جعفری آپ کے لیے نیک تمنائیں’۔

اس خبر کے سامنے آنے کے بعد سوشل میڈیا پر ثناء کے مداح افسوس کرنے کے ساتھ ان دونوں کے مستقبل کے لیے نیک خواہشات کا اظہار کررہے ہیں۔ خیال رہے کہ ثناء نے 2008 میں اپنے کیرئیر کے عروج پر ماڈل فخر امام سے لو میرج کی تھی اور دونوں کے دو بیٹے عاضی امام اور ریان امام ہیں، دونوں کے درمیان کچھ عرصہ سے اختلافات چل رہے تھے۔

اگرچہ گزشتہ کچھ عرصے سے ثناء اسکرین سے دور ہیں لیکن وہ ٹی وی شوز اور پروگراموں میں بطور مہمان دکھائی دیتی ہیں اور ماڈلنگ میں بھی حصہ لیتی رہتی ہیں۔اس کے ساتھ ساتھ وہ سوشل میڈیا پر بھی ایکیٹو رہتی ہیں اور مداحوں سے اپنی تصاویر وغیرہ شیئر کرتی رہتی ہیں۔

مزید پڑھیں: فیروز خان پر سابقہ اہلیہ نے تشدد، بے وفائی اور بلیک میلنگ کے الزامات عائد کردئیے

یاد رہے کہ ثناء نے 1997 میں فلموں سے کیریئر کا آغاز کیا تھا اور وہ 2000 کی مقبول ہیروئنز میں سے ایک ہیں، وہ بولی وڈ فلم انڈسٹری کی بھی ایک فلم “قافلہ” میں اپنے اداکاری کے جوہر دیکھا چکی ہیں۔ایک طویل عرصے تک فلمی صنعت سے وابستہ رہنے کے بعد ثناء اب ڈرامہ انڈسٹری سے وابستہ ہیں، انہوں نے سال 2012 میں اپنا پہلا ڈرامہ “جینا سیکھا دو ہمیں” کیا، جس میں انہیں کافی پذیرائی ملی اور اس کے بعد انہوں متعدد ڈراموں میں اداکاری کی۔جبکہ اداکارہ کا پورا فنی کیرئیر تنازعات سے پاک ہے، کبھی بھی ان کا نام کسی بھی تنازعے کا حصہ نہیں بنا ہے۔اس کے علاوہ گزشتہ برسوں سے ثناء اپنی صحت اور فٹنس پر بھی خصوصی توجہ دے رہی ہیں جس کی مدد سے انہوں نے اپنے وزن میں نمایاں کمی کی ہے یہی وجہ ہے کہ آج ان کا شمار پاکستان کی چند فٹ ترین اداکاراؤں میں ہوتا ہے۔

گزشتہ دنوں بھی پاکستانی سپر اسٹارز کی جوڑی احد رضا میر اور سجل علی نے 2 سال کی شادی کے بعد اپنی راہیں جدا کرلیں۔ سجل اور احد کی جوڑی ان جوڑیوں میں سے ایک تھی جسے مداح کافی پسند کرتے تھے تاہم گزشتہ برس سے سوشل میڈیا پر اس جوڑے کے بارے میں علیحدگی کی خبریں زیر گردش تھیں مگر ان دونوں کی جانب سے باضابطہ طور پر ان افواہوں کی تصدیق یا تردید نہیں کی گئی تھی تاہم رواں برس مارچ کے مہینے میں ان خبروں کی تصدیق ہوگئی اور دونوں کے درمیان طلاق ہوگئی۔