شوہر پر فخر ہے،علاج کیلئے عمر شریف کو امریکا لانے کیلئے کوشاں ہیں

پاکستان فلم انڈسٹری کی ورسٹائل اداکارہ ریما خان کا کہنا ہے کہ ان کے شوہر ڈاکٹر سید طارق شہاب، کنگ آف کامیڈی عمر شریف امریکا لانے اور یہاں علاج معالجے کی سہولتیں دینے کے لیے کوشش کر رہے ہیں۔

گزشتہ کچھ عرصے سے لیجنڈری اداکار، کامیڈین و میزبان عمر شریف کی طبیعت ناساز ہے۔ جیو نیوز کے مطابق ان کے بیٹے جواد عمر کا کہنا ہے کہ وہ دِل کے عارضے میں مبتلا ہیں لیکن مسلسل علاج کے باوجود ان کی حالت نازک ہے۔ جواد عمر نے بتایا کہ اگر عمر شریف کو امریکا نہ بھیجا گیا تو اوپن ہارٹ سرجری کرنی پڑے گی، انہوں نے مداحوں سے عمر شریف کی جلد صحتیابی کے لئے دعا کی اپیل بھی کی۔

کچھ دن قبل سوشل میڈیا پر عمر شریف کی ایک ویڈیو بھی وائرل ہوئی جس میں انہوں نے حالت بگڑنے پر وزیراعظم عمران خان سے اپنے علاج کے سلسلے میں مدد طلب کی تھی۔ جس کے بعد وفاقی حکومت نے علیل اداکار کو امریکا لے جانے کے لیے انتظامات کرنا شروع کردئیے اور اداکار کے لئے ائیر ایمبولنس کا بندوبست کردیا گیا ہے جبکہ آج ویزا ملنے کا بھی امکان ہے۔

واضح رہے کہ امریکہ میں عمر شریف کے علاج معالجے میں ریما خان کے شوہر ڈاکٹر شہاب طارق معاونت فراہم کرینگے۔ اس حوالے سے ریماخان نے اپنے آفیشل انسٹاگرام اکاؤنٹ پر عمر شریف کے ساتھ اپنی ایک یاد گار تصویر شیئر کی اور ساتھ کیپشن میں ان کے لئے ایک تفصیلی پیغام بھی جاری کیا ہے۔

فلم اسٹار نے لکھا کہ عمر شریف کا شمار برصغیر کے عظیم مزاح نگاروں میں ہوتا ہے، بلاشبہ وہ ہر دور کے ایک حقیقی لیجنڈ ہیں، ہمیشہ دوسروں کو ہنسانے اور مسکرانے کے لیے سخت محنت کرتے ہیں۔

ریما خان نے اپنی پوسٹ لکھا کہ آج یہ جان کر پریشان ہوں کہ وہ اپنی شدید بیماری کی وجہ سے درد اور تکلیف میں ہیں۔ انہوں نے لکھا کہ مجھے اپنے شوہر پر فخر ہے جو عمر شریف کو علاج معالجے کیلئے امریکا لانے کے لیے کوشاں ہیں۔ ڈاکٹر سید طارق شہاب نے ہائی رسک طریقہ کار کو انجام دینے پر اتفاق کیا ہے اور امریکا منتقل کرنے کے انتظامات میں عمر شریف کے خاندان کی مدد کر رہے ہیں۔ ریما خان نے اپنے پیغام میں مزید کہا کہ میں نے ان سے درخواست کی ہے کہ عمر شریف صاحب کو اس بیماری سے صحت یاب ہونے میں ہر ممکن مدد کریں۔

دریں اثناء، عمر شریف کے بیرون ملک علاج کے لئے وزیراعظم کے معاون خصوصی برائے سیاسی روابط ڈاکٹر شہباز گل نے ٹوئٹر پر اپنی ٹوئٹ میں لکھا ہے کہ اداکار عمر شریف کو بہت جلد ویزا جاری ہو جائے گا۔

انہوں نے کہا ہے کہ وزیراعظم آفس نے عمر شریف کے خاندان کے تعاون سے ویزے کے تمام کوائف متعلقہ سفارت خانے بھجوا دیئے ہیں ، وزیراعظم آفس اداکار عمر شریف کے خاندان کیساتھ مسلسل رابطے میں ہے اور ان کیساتھ ہر ممکن تعاون کیا جائے گا۔

کامیڈی کے بادشاہ اداکار عمر شریف کا شمار برصغیر کے صف اول کے اداکاروں میں ہوتا ہے جنہوں نے ناصرف اپنی کامیڈی سے پاکستان بلکہ بھارت کے کئی ممتاز اداکاروں کو متاثر کیا۔ ان کے نقش قدم پر چل کر اور انہیں کاپی کرکے کئی لوگ بہترین کامیڈین بنے جس کا وہ برملا اعتراف کرتے ہیں۔

خیال رہے کہ سوشل میڈیا کے مختلف پلیٹ فارمز پر عمر شریف کی مختلف تصاویر وائرل ہو رہی ہیں جنہیں بڑے پیمانے پر شیئر کیا جا رہا ہے۔ ان وائرل تصاویر میں عمر شریف کو اسپتال کے بیڈ پر لیٹا دیکھا جاسکتا ہے جبکہ ان کے چہرے پر مختلف نلکیاں لگی ہوئی ہیں جس سے اندازہ لگایا جاسکتا ہے کہ معروف کامیڈین کی حالت تشویشناک ہے۔ تصویروں کے وائرل ہونے پر برصغیر میں ان کے کڑوڑوں مداحوں نے ان کی جلد صحت یابی کے لیے دعائیں بھی پوسٹ کیں۔