اداکارہ اریبہ حبیب رشتہ ازدواج میں منسلک ہوگئیں

ماڈل و اداکارہ اریبہ حبیب نے خوشی خوشی شادی کا لڈو کھالیا اور نیا سال کا استقبال شادی کے خوبصورت بندھن میں بندھ کیا ہے۔ سوشل میڈیا پر اداکارہ کی شادی کی متعدد ویڈیوز اور تصاویر سوشل میڈیا پر وائرل ہو رہی ہیں جبکہ ساتھی اداکاروں کی جانب سے مبارکباد دینے کا سلسلہ بھی جاری ہے۔

اریبہ حبیب نے اپنی زندگی کے اس خاص دن پر لال رنگ کے عروسی لباس کا انتخاب کیا ہے جبکہ ان کے شوہر سعدین شیخ نے گہرے نیلے رنگ کی شیروانی پہنی ہے۔نکاح کی یہ تقریب دن کے وقت ہوئی۔ اپنی زندگی کے اس خوبصورت دن کو یادگار بنانے کے لئے اداکارہ کی جانب سے نکاح نامے پر دستخط سے لیکر تقریب کے ہر ہر لمحے کی تصاویر پوسٹ کی گئیں۔ ان تصاویر میں اداکارہ کو شوہر کے ہمراہ خوشگوار موڈ میں بیٹھا دیکھا جاسکتا ہے جبکہ اسٹیج کے اردگرد دیگر مہمان بھی موجود ہیں۔

مزید براں ، ان نکاح کی ایک ویڈیو بھی سوشل میڈیا پر کافی وائرل ہوئی جس میں اداکارہ کے شوہر نے نکاح کے بعد ان کو محبت سے ماتھے پر بوسہ کیا جس پر مہمانوں نے خوب شور کیا۔

اس سے پہلے اریبہ حبیب کی جانب سے اپنے مایوں ومہندی کی رسم کی خوبصورت تصویریں سوشل میڈیا پر شیئر کی گئیں جس میں انہوں نے اورنج کلر کا خوبصورت لہنگا اور پھولوں کا زیور پہنا ہوا ہے۔ ان وائرل تصویروں میں اریبہ مہمانوں کے ساتھ اپنی مہندی کی رسم خود بھی انجوائے کرتی نظر آئیں۔

اداکارہ نے رواں برس اگست میں اپنے ہونے والے جیون ساتھی کے ہمراہ تصویر شیئر کرتے ہوئے مداحوں کو بتایا تھا کہ ان کی بات ’پکی‘ ہوگئی ہے۔ اس حوالے سے یہ بات بھی سامنے آئی کہ ان کے شوہر سعدین کا شوبز سے کوئی تعلق نہیں۔

علاوہ ازیں، شادی سے چند دن پہلے انسٹاگرام پر اداکارہ نے شادی کا کارڈ شیئر کرتے ہوئے ہیش ٹیگ ’اریبہ ویڈز سعدین‘ کا استعمال کرتے ہوئے ایک تصویر پوسٹ کی جس میں ان کی شادی کا کارڈ ایک فریم میں تھا اور اسے سنہری خطاطی کے ساتھ لکھا گیا جبکہ ساتھ میں ایک موم بتی اور مٹھائی کا ڈبہ بھی موجود تھا۔

خیال رہے کہ اداکارہ اریبہ حبیب نے شوبز انڈسٹری میں اپنے کیرئیر کا آغاز ماڈلنگ سے کیا، اس کے بعد وہ اے آر وائے کے کامیاب ڈرامے ’کوئی چاند رکھ‘ کے ساتھ ٹیلی ویژن کی دنیا میں ڈیبیو کیا اور ‘نیہر’، ’جانباز’ اور ’جلن’ جیسے ڈراموں میں بہترین اداکاری کی۔ اریبہ ٹی وی ڈراموں میں کام کرنے کے ساتھ ساتھ اپنا ویڈیو لاگنگ بھی کر رہی ہیں۔ وہ اپنے ویڈیو لاگز میں مداحوں کو اپنی روز مرہ کی زندگی سے آگاہ کرتی ہیں، ایسا کرنے کا ان کا مقصد صرف یہ ہے کہ لوگوں کو اس بات کا اندازہ ہو کہ مشہور شخصیات بھی عام لوگوں کی طرح ہی زندگی گزارتی ہیں۔

یاد رہے چند روز قبل اداکارہ اریبہ حبیب نے نجی ٹی وی پروگرام ٹائم آؤٹ ود احسن خان میں شرکت کی تھی، جہاں اداکارہ نے پاکستانی فلم انڈسٹری میں آئٹم نمبرز کی مخالفت کرتے ہوئے کہا تھا کہ ہمارے پاس ان کے دیکھنے والے موجود نہیں ہیں اور نہ ہی ہم اپنی لڑکیوں کو آئٹم نمبر میں دیکھنا چاہتے ہیں۔