اداکار شہروز سبزواری وزیراعظم عمران خان سے ناراض کیوں؟

نوجوان اداکار شہروز سبزواری آج کل اپنی ایکٹینگ سے زیادہ سوشل میڈیا پر اپنی پوسٹوں کے باعث خبروں میں “اِن” رہتے ہیں۔ بلکہ کئی بار تو وہ سوشل میڈیا پر اپنے متضادبیانات کی وجہ سے صارفین کی شدید تنقید کا نشانہ بھی بنے ہیں۔ لیکن اس بار انہوں نے ایک سنجیدہ بلکہ حساس مسئلے کی طرف توجہ دلوائی ہے اور وہ وزیر اعظم عمران خان سے سخت ناراض ہیں۔

اداکار شہروز سبزواری نے اپنے انسٹاگرام اکاؤنٹ پر ایک اسٹوری شیئر کی جس میں انہوں نے پاکستان تحریک انصاف ( پی ٹی آئی) اور وزیر اعظم عمران خان کے آفیشل اکاؤنٹس کو بھی ٹیگ کیا۔

انسٹا گرام پر شہروز سبزواری نے اپنی اسٹوری میں کہا کہ “عمران خان ہم آپ کے سپوٹر (حمایتی)ضرور ہیں مگر حضور پاک صلؔی اللہ علیہ وآلٖہ وسلؔم کے سامنے یہ کائنات بھی کچھ نہیں ہے۔” پاکستانی ڈرامہ انڈسٹری کے اداکار شہروز سبزواری نے اپنی پوسٹ میں یہ بھی لکھا کہ “پنجاب ٹیکسٹ بُکس کو ٹھیک کرو ورنہ تباہی تیرا مقدر ہے۔”

بطور مسلمان ہمارا یہ ماننا ہے کہ حضرت محمد صلؔی اللہ علیہ وآلٖہ وسلؔم ہمارے آخری نبی ہیں اور ہمارا ایمان ہے کہ ان کے بعد کوئی نبی نہیں آئے گا۔

اس حوالے سے یہ یاد رہے کہ وزارت مذہبی امور نے پیغمبر اسلام حضرت محمد مصطفی صلؔی اللہ علیہ وآلٖہ وسلؔم کے نام کے ساتھ خاتم النبیین استعمال کرنے کا باقاعدہ نوٹیفکیشن جاری کیا جس کہ مطابق سرکاری و غیر سرکاری تمام امور میں آپ صلی اللہ علیہ وسلم کے نام کے ساتھ خاتم النبیین لکھا اور پڑھا جائے گا۔

واضح رہے کہ گزشتہ سال پنجاب میں قومی ہیروز اور ملکی سالمیت کے خلاف مواد پر مبنی31 پبلیشرز کی کتابوں پر پابندی عائد کی گئی تھی۔

شہروز سبزواری نےپنجاب کی نصابی کتب سے ناکافی معلومات کو فوری طور پر ٹھیک کرنے کامطالبہ کیا ہے۔سوشل میڈیا پر اداکار کی جانب سے اس سنجیدہ مسئلے کو اجاگر کرنے پر کچھ مداحوں نے تو ان کے موقف کی حمایت کی جب کہ دیگر مداحوں نے انہیں وزیر اعظم سے درخواست کرنے کی بجائے دھمکی آمیز رویہ اپنانے پر تنقید کا نشانہ بنایا۔

دیکھا جائے تو میڈیا انڈسٹری کے نوجوان اداکار اور بہروز سبزواری کے بیٹے شہروز سبزواری ماڈل صدف کنول سے دوسری شادی اور پہلی اہلیہ سائرہ یوسف سے طلاق پر سوشل میڈیا پر شدید تنقید کا نشانہ بنے بلکہ یوں کہنا بجا ہو گا کہ دوسری شادی کرنے پر مداحوں نے انہیں آڑے ہاتھوں لیا اور سوشل میڈیا پر کئی مہینوں تک ان کی شادی پر بحث نے تھمنے کا نام نہیں لیا تھا۔