زرنش خان نے سگریٹ نوشی کرنیوالی خواتین کے بارے میں کیا کہا؟

زرنش خان شوبز انڈسٹری کی جانی مانی ایکٹر یس ہیں جنہوں نے بہت سے مشہور ڈراموں میں کام کیا ہوا ہے۔ان مشہور ڈراموں میں ،سسرال میرا ،لاج ،سن یارا، دی اجازت ،اک محبت کافی ہے اور عشق زہے نصیب میں اپنی اداکاری سے لوگوں کو اپنا گرویدہ بنا چکی ہیں۔

حال ہی میں زرنش خان “مومنہ کی مکسڈ پلیٹ” میں ایک انٹرویو دیا۔ اس انٹرویو میں انہوں نے اپنے شوبز کیرئیر کے علاوہ خواتین کے سگریٹ نوشی اور اس سے جڑے مسائل پر میزبان سے کھل کر بات چیت کی اور مداحوں کو اپنا نظریئے سے آگاہ کیا۔ انہوں نے کہا کہ ہمارے معاشرے میں جب نچلے طبقے کی خواتین سگریٹ نوشی کرتی ہیں تو اسے ٹھیک سمجھا جاتا ہے مگر جب متوسط اور اعلیٰ طبقے کی خواتین سگریٹ پیتی ہیں تو ان کو برا قرار دیدیا جاتا ہے۔

اداکارہ نے کہا کہ ہمارے ملک میں لوگوں نے یہ ذہنیت بنا رکھی ہےکہ اگر کوئی لڑکی پینٹ شرٹ پہن لے یا سگریٹ نوشی کرے تو لوگ اس کے بارے میں خود ساختہ رائے قائم کر لیتے ہیں اور اس عورت کو عیاش سمجھتے ہیں۔ زرنش نے کہا کہ ہمیں اپنی اس ذہنیت کو بدلنا چاہیے، کسی کو بے کردار یا بُرا صرف اس لیے سمجھنا بالکل غلط ہے کہ وہ سگریٹ نوشی کرتی ہے یا پھر وہ ماڈرن کپڑے پہنتی ہے۔ ان کا یہ بھی کہنا تھا کہ ہماری عوام کنفیوژن کا شکار ہے اور اسے خود سمجھ نہیں آتا کہ وہ کس کو فولو کرے۔ ضروری ہے کہ ہم اپنے مائینڈ سیٹ کو بدلیں لیکن افسوس کہ یہ ہماری ذہنیت بن چکی ہے۔ تاہم اداکارہ کا یہ بھی کہنا تھا سگریٹ نوشی مرد اور عورت دونوں کی صحت کے لیے مضر ہے۔

انٹرویو کے اختتام میں زرنش نے اپنے نئے آنے والے ڈرامے “اعتبار “ کے بارے میں بھی مداحوں کو آگاہ کیا اور بتایا کہ یہ ڈرامے ناظرین کو آج کل کے ڈراموں سے مختلف لگے گا۔

خیال رہے کہ گزشتہ دنوں میرا کی انگریزی کا مذاق اڑانے والوں کوزرنش خان نے آڑے ہاتھوں لے لیا تھا۔ لکس اسٹائل ایوارڈز کی تقریب میں میرا کا ایک ویڈیو کلپ کافی وائرل ہوا جس میں وہ ٹوٹی پھوٹی انگریزی میں باتیں کرتے ہوئے کہتی ہیں کہ ’میں لکس کو مبارکباد پیش کرتی ہوں کہ انہوں نے اپنی کامیابی مکمل کرلی اور ’آئی ایم‘ بہت خوش ہوں آج‘۔

سوشل میڈیا پر میرا کے اس کلپ کا خوب مذاق اڑایا گیا اور صارفین نے مختلف میمز بھی بنا کر شیئر کیں تھی ۔ میرا کی ویڈیو پر صارفین کا مزاحیہ ردّعمل دیکھ کر زرنش خان سیخ پا ہوگئیں تھیں اور اُنہوں نے اداکارہ کی حمایت میں انسٹاگرام پر خصوصی اسٹوری شیئر کی تھی۔ یاد رہے کہ سماجی رابطے کی ویب سائٹ انسٹاگرام پر ان کے فالوورز کی تعداد 20 لاکھ ہے۔