واٹس ایپ پر پرانے میسج ڈھونڈنا ہوا آسان، بس تاریخ ڈالیں اور میسج ڈھونڈیں

دنیا بھر میں پیغام رسانی کے لیے استعمال ہونے والی سب سے مقبول ایپلی کیشن واٹس ایپ نے آئی او ایس صارفین کے لیے چیٹ کا زبردست فیچر پیش کیا ہے جس کے تحت اب پرانے پیغامات ڈھونڈنے میں کسی پریشانی کا سامنا نہیں کرنا پڑے گا۔ اس فیچر پر گزشتہ دو برسوں سے کام جاری تھا لیکن بیچ میں یہ تاخیر کا شکار ہوگیا تاہم اب اسے پیش کردیا گیا ہے۔

واٹس ایپ بیٹا انفو کی جاری کردہ رپورٹ میں بتایا گیا ہے کہ اب آئی او ایس کے صارفین کو چیٹ میں تاریخ کا ایک آپشن دکھائی دے گا، جسے استعمال کرتے ہوئے وہ پرانا پیغام ڈھونڈ سکیں گے۔اس حوالے سے واٹس ایپ بیٹا انفو نے ایک اسکرین شاٹ بھی جاری کیا ہے، جسے دیکھ کر یہ اندازہ لگایا جاسکتا ہے کہ اس فیچر کو کیسے استعمال کرسکتے ہیں۔چیٹ میں ‘کیلینڈر’ کا آئیکن دیکھا جاسکتا ہے، جس پر کلک کر کے تاریخ کا انتخاب کیا جاسکتا ہے۔

واٹس ایپ بیٹا انفو کے مطابق اس فیچر کو فوری طور پر صرف کچھ خوش قسمت صارفین  کے لیے پیش کیا گیا ہے۔تاہم آنے والے چند روز میں یہ فیچر تمام صارفین کے لیے پیش کردیا جائے گا۔واٹس ایپ کی جانب سے حالیہ دنوں میں متعدد نئے فیچر متعارف کروائے گئے ہیں جس کا مقصد صارفین کا ایپ پر اعتماد برقرار رکھنا اور دیگر ایپس کے مقابلے میں سبقت لے جانا بھی شامل ہے۔

واضح رہے کہ واٹس ایپ کے بانی جان کوم اور برائن ایکٹن نے 2007 میں ایک کمپنی سے استعفیٰ دے دیا تھا۔ اس کے بعد انہوں سے فیس بک میں ملازمت کے لئے درخواست دی، جس کو نظر انداز کر دیا گیا۔ فروری 2009 میں انہوں نے واٹس ایپ کا آغاز کیا اور صرف پانچ سال بعد 2014 میں، واٹس ایپ کی مقبولیت کی وجہ سے فیس بک نے اس کو 19 ارب ڈالر کی ناقابل یقین قیمت میں خریدلیا تھا۔ جن میں سے 4 ارب کیش جبکہ باقی رقم فیس بک شئیرز کی صورت میں دی گئی، یوں یہ دونوں فیس بک میں 12 فیصد شئیرز کے مالک ہیں۔ جبکہ نوکیا جیسی کمپنی کا موبائل ڈویژن مائیکروسافٹ نے تقریباً ساڑے 7 ارب ڈالر میں خرید تھا۔ واٹس ایپ کی فروخت کو ٹیکنالوجی کی دنیا کا سب سے مہنگا سودا کہا جاسکتا ہے۔

دیکھا جائے تو اس وقت دنیا میں ہر 4 میں سے ایک آدمی کے پاس واٹس ایپ کا اکاؤنٹ موجود ہے۔اس کمپنی نے 2018 میں 50 کروڑ صارفین حاصل کرنے کا سنگ میل عبور کیا تھااور آج اس ایپلیکیشن کے صارفین روزانہ 42 ارب میسجز کا تبادلہ کرتے ہیں۔ یہی نہیں، واٹس ایپ کے پلیٹ فارم کے ذریعے ہر 24 گھنٹوں میں ڈھائی کروڑ وڈیوز بھی ایک دوسرے سے شئیر کی جاتی ہیں۔اس ایپ کی خاص بات یہ ہے کہ یہ سروس مفت دستیاب ہے۔ پہلے تک اس سروس کی فیس ایک ڈالر سالانہ تھی مگر کمپنی نے جنوری 2016 سے وہ بھی ختم کردی اور ہر صارف بغیر کسی خرچ اور اشتہارات کی جھنجٹ کے، واٹس ایپ استعمال کرسکتا ہے۔

مزید پڑھیں: واٹس ایپ اب مفت نہیں رہا، کمپنی کا بڑا فیصلہ

مزید برآں، چونکہ دنیا کا یہ مقبول ترین میسنجر ہر سال متعدد نئے فیچرز متعارف کرواتاہے اسی وجہ سے اس کے صارفین کی تعداد میں روزباروز اضافہ ہوتا جارہا ہے۔عالمی خبررساں ایجنسی کے مطابق 2019 میں بھی واٹس اپ نے اپنی مقبولیت برقرار رکھنے اور صارفین کی توجہ حاصل کرنے کے لیے نئے فیچرز متعارف کرانے کا فیصلہ کیا تھا اور توقع کی جارہی ہے کہ یہ نئے فیچرز بہت جلد عوام الناس میں مقبولیت حاصل کرلیں گے۔