ٹھنڈی ٹھنڈی آئسکریم سے وزن گھٹائیں

بچے ہوں یا بڑے آئسکریم بہت ہی شوق سے کھاتے ہیں اور گرمیوں میں تو اس کی طلب مزید بڑھ جاتی ہے۔ البتہ ایسے افراد جو وزن کم کرنے کے خواہشمند ہوتے ہیں وہ آئسکریم سے ذرا دور رہتے ہیں کہ کہیں اس میں موجود کریم اور چینی ان کا وزن بڑھانے کا سبب نہ بن جائے۔ لیکن یہاں آپ کو ایک دلچسپ بات بتائیں کہ آئسکریم آپ کو دبلا پتلا کرنے میں اہم کردار ادا کرسکتی ہے۔ یہ پڑھ کر آپ کو بھی حیرت کا جھٹکا لگا ہوگا، اس حوالے سے 2002ء میں رائٹر ہولی میک نے ایک کتاب لکھی تھی جس میں انہوں نے انسانی وزن پر آئسکریم کے اثرات کا تسلی بخش جائزہ لیا تھا۔

مجموعی طور پر، آئسکریم ہر روز استعمال کرنے والی کیلوریز کی تعداد کو کم کرنے کی ترغیب دیتی ہے (ترجیحی طور پر 1250 کیلوریز یومیہ تک) آپ اس میں 250 کیلوریز والی اپنی پسندیدہ آئس کریم کو شامل کر سکتے ہیں. نتیجتاً، ایک ہی وقت میں اپنے پسندیدہ ذائقے والی آئسکریم سے لطف اندوز ہوتے ہوئے آپ کا وزن کم ہوجائے گا۔

اس فارمولے پر عمل کرتے وقت آئسکریم کی غذائی ساخت کو ذہن میں رکھنا انتہائی ضروری ہے کیونکہ بھرپور اور کریمی آئسکریم کیلوریز میں اضافہ کرتی ہے اس لیے اس سے پرہیز کریں اور اس بات کو یقینی بنائیں کہ آپ جو آئسکریم کھانے جارہے ہیں اس میں صرف 250 کیلوریز ہوں۔آپ کم کیلوریز والی آئسکریم گھر میں بھی تیار کرسکتے ہیں وہ کیسے چلیں جانتے ہیں؛

:بنانا فروزن آئسکریم

اس آئسکریم کو تیار کرنے کے لئے آپ 6 سے 8 کیلوں کو چھیل کرسلائس میں کاٹ کر فریزر میں کم سے کم 6 گھنٹے کے لئے رکھ دیں۔ جب یہ جم جائیں تو کیلوں کو بلینڈر میں ڈالیں اور اس میں تھوڑی سی کریم اور کنڈنسڈ ملک شامل کرکے اتنا بلینڈ کریں کہ یہ مکسچر کریمی شکل اختیار کرلے پھر اسے دوبارہ فریزر میں دو گھنٹے کے لے رکھ دیں اب اسے اسکوپ سے نکال کر پیش کریں مزیدار میں فروزن بنانا آئسکریم تیار ہے۔ اس آئسکریم پر آپ نیوٹیلا، ڈرائی فروٹ، چاکلیٹ چپس کی ٹاپنگ کرکے اسے مزید مزیدار بناسکتے ہیں۔

:ونیلا آئسکریم

اس آئسکریم کو بنانے کے لیے ایک پیالی ڈبل کریم، دودھ دو پیالی ،انڈےچار عدد (زردی الگ کرلیں) ، شکر تین چوتھائی پیالی، ونیلا ایسنس حسب ضرورت۔ ایک نان اسٹک پین میں دودھ اور کریم ڈال کر درمیانی آنچ پر پکائیں اور لکڑی کے چمچے سے مکس کریں۔پیالے میں انڈے کی زردی، ونیلا ایسنس اور شکر ڈال کر خوب پھینٹیں،اس کے بعد اس میں کریم اور آدھی پیالی دودھ کے آمیزے کو زردی میں ڈال کر بیٹر سے اچھی طرح مکس کریں۔

اس کے بعد زردی والے آمیزے کو سوس پین میں گرم ہوتے ہوئے آمیزے میں شامل کرکے ہلکی آنچ پر آٹھ منٹ تک پکائیں۔آمیزہ اتنا گاڑھا ہوجائے کہ چمچے پر اس کی کوٹنگ سی بننے لگے تو سوس پین کو چولہے سے ہٹالیں۔آمیزے کو چھان کر سانچے میں ڈالیں اور ڈھانپ کر فریزر میں رکھیں۔اس کے بعد نکال کر بیٹر سے پھینٹ کر دوبارہ چھ سے آٹھ گھنٹے کے لئے فریزر میں رکھ دیں۔مزیدار آئسکریم تیار ہے۔

یہاں یہ بتاتے چلیں کہ آئسکریم میں عمومی طور پر شامل کیے جانے والے اجزاء میں انڈے کی زردی، شکر ، دودھ، کریم اور پھل شامل ہوتے ہیں۔اگر آئسکریم میں صرف یہی اجزاء شامل ہوں تب تو یہ واقعی فائدہ مند ہےلیکن یہ بات ہم سب جانتے ہیں کہ مختلف برانڈز اپنی آئسکریم میں صرف یہی اشیاء استعمال نہیں کرتے بلکہ وہ اس میں بے تحاشہ چینی، مصنوعی مٹھاس اور مصنوعی رنگ بھی شامل کرتے ہیں اور یہ تمام اشیاء انسانی صحت کے لیے نہایت مضر ہیں اور ان کا صرف ایک بار بھی استعمال صحت پر منفی اثرات مرتب کرسکتا ہے تو ان کا روزانہ استعمال کس قدر نقصان دہ ہوگا۔ لہٰذا، اگر آپ گھر میں صحت بخش اشیاء سے آئسکریم تیار کریں گے تو یہ یقیناً آپ کے لیے فائدہ مند ہوگی۔