سندھی ڈیجیٹل زبان بن گئی

دنیا میں ڈیجیٹل ہونے والی چند مخصوص زبانوں کی طرح اب سندھی زبان بھی ڈیجیٹلیز ہوگئی ہے۔ رواں سال سندھی زبان نے اسٹینفورڈ یونیورسٹی اور گوگل کے مشترکہ منصوبے یونیورسل ڈیپینڈنسیز کے ذریعہ ڈیجیٹلائزیشن کے لئے منتخب ہونے والی پاکستان کی پہلی زبان بن کر ایک تاریخی سنگ میل حاصل کر لیا۔

یونیورسل ڈیپینڈنسیز (یو ڈی) جو 2005 میں قائم ہوا کہ ایک حالیہ پروجیکٹ میں عالمی سطح پر بولی جانے والی زبانوں کو مشین ریڈایبل بنانے کے لئے کام کیا جارہا ہے، اس پروجیکٹ میں پوری دنیا میں بولی جانے والی 6000 زبانوں میں سے 100 زبانیں منتخب کی گئی ہیں، جن میں ایک زبان سندھی بھی ہے۔

یونیورسل ڈیپینڈنسیز کے پلیٹ فارم میں پاکستان سے سندھی زبان کی شمولیت کو ماہرین لسانیات نے ایک اہم پیشرفت قرار دیا ہے۔پاکستان کی قومی زبان اردو کو بھارت کی تجویزپراس پروجیکٹ میں شامل کیا گیا ہے۔

اقوام متحدہ کے ادارے یونیسکو جو تعلیمی، سائنسی اور ثقافتی تنظیم ہے کی ایک رپورٹ یہ بتاتی ہے کہ دنیا میں بولی جانے والی 6000 زبانوں میں سے کم از کم 43 فیصد زبانیں خطرے سے دوچار ہیں۔ اس حوالے سے یونیسکو نے خبردار کیا ہے کہ اس صدی کے آخر تک ان میں سے نصف زبانیں ختم ہوجائیں گی۔

سندھی زبان کی اہمیت کے بارے برطانوی ورلڈ میپیر جو دنیا کے نقشوں کامجموعہ پیش کرتے ہیں کے مطابق سندھی ایسی زبان ہے جو کم از کم نو علاقوں میں تقریبا 24 ملین افراد بولتے ہیں۔

اس حوالے سے یہ خیال رہے کہ سندھ دنیا کی قدیم ترین زبانوں میں سے ایک ہے جو دائیں ہاتھ کی طرف سے عربی رسم الخط میں لکھی جاتی ہے۔ سندھ تہذیب سے منسلک ہے اور اس زبان کے پہلے ریکارڈ شدہ اسکرپٹ نمونے سندھ میں موہنجو دڑو کی کھدائی کے دوران پائے گئے تھے۔ سندھی زبان کے ارتقاء کے بارے میں ماہرین لسانیات وادب کا کہنا ہے کہ سندھی زبان اردو کے مقابل میں زیادہ قدیم ہے، دسویں صدی عیسوی تک یہ زبان کافی ارتقاء پاچکی تھی جب کہ اردو اپنے ابتدائی ارتقاء سے بھی آگے نہ تھی، سندھ کے مشہور صوفی شاعرسچل سرمست کے کلام میں بھی اردو ہندوستانی لب و لہجے میں نظر آتی ہے۔

برطانوی دور حکومت میں تقسیم ہند سے قبل اور اس کے بعد بھی سندھی زبان میں بہت سی کتابیں اور لیٹریچر شائع ہوا۔ اس سے یہ بات واضح ہوتی ہے کہ سندھی اور اردو زبان کی جڑیں تقسیم ہند سے پہلے سے جڑی ہوئی ہیں ۔تاہم اب یونیورسل ڈیپینڈنسیز میں سندھی زبان کی شمولیت سے اس زبان کی آن لائن رسائی ممکن ہوسکے گی اور یہ زبان مکمل طور پر ڈیجیٹلیز ہوجائے گی۔