پاکستانی گلوکارہ و ماڈل شاعرہ رائے ٹرانس ویمن کے عالمی مقابلے کیلئے منتخب ہوگئیں

متحدہ عرب امارات میں رہائش پذیر پاکستانی گلوکارہ و ماڈل شاعرہ رائے تھائی لینڈ میں منعقد ہونے والے ٹرانسجینڈر کے ‘مس انٹرنیشنل کوئین’ کے مقابلے میں حصہ لیں گی۔ مس ٹرانس پاکستان شاعرہ رائے کو ان کی ماڈلنگ کے باعث اس عالمی مقابلے میں حصہ لینے کے لئے منتخب کیا گیا ہے۔ عالمی سطح کے اس مقابلے میں شامل ہونے کے بعد شاعرہ رائے پاکستانی کی پہلی ٹرانس ویمن بن جائیں گی جو کہ عالمی سطح پر نامور بڑے بیوٹی کونٹیسٹ میں پاکستان کی نمائندگی کرینگی۔

شاعرہ رائے جنہوں نے لڑکے کے طور پر پیدا ہوکر جوانی سے قبل اپنی جنس تبدیل کروالی تھی ،کو عام طور پر لوگ ٹرانس جینڈر گلوکارہ ہی سمجھتے ہیں۔تاہم وہ گلوکارہ ہونے کیساتھ ساتھ ماڈلنگ بھی کرتی ہیں اور وہ اس بین الاقوامی مقابلے میں دیگر ممالک کی ماڈلز کے ہمراہ پاکستان کی نمائندگی کرینگی۔ واضح رہے کہ شاعرہ رائے پنجاب کے شہر سیالکوٹ میں پیدا ہوئیں اور بچپن میں ہی والدین کے ہمراہ لاہور منتقل ہوگئیں، جہاں انہوں نے کالج تک تعلیم حاصل کی۔درحقیقت انہوں نے جینڈر ڈس آرڈر اور ہارمونز کی خرابی کے باعث جوانی سے قبل ہی اپنی جنس تبدیل کروالی تھی۔

شاعرہ رائے پیدائش سے لے کر تقریباً بلوغت تک لڑکا ہی تھیں تاہم ان میں کبھی بھی لڑکوں والے احساسات نہیں جاگے اور ان کی شکل بھی لڑکیوں کی طرح تھی۔گلوکارہ کے مطابق وہ بچپن سے ہی اپنے جنسی مسائل سے متعلق آگاہ تھیں اور ان کی والدہ کو بھی ان کی پریشانیوں کا علم تھا مگر ان کی باتوں پر کوئی یقین نہیں کرتا تھا اور ہر کوئی سمجھتا تھا کہ وہ بہانے اور ڈرامے کر رہی ہیں۔

جنس تبدیل کروانے سے قبل بھی انہیں بہت سارے لوگ پریشان کرتے تھے اور تبدیلی جنس کے بعد انہیں مزید تنگ کیا گیا، جس کے باعث انہوں نے کم سے کم لوگوں سے تعلقات رکھے۔ پھر وہ اعلیٰ تعلیم کے لیے دبئی چلی گئیں ، وہاں انہوں نے ابتدائی طور پر ماڈلنگ کا آغاز کیا۔

ماڈلنگ کی دنیا میں قدم رکھنے کے بعد انہوں نے رائے موشن پکچر کے نام سے اپنا پروڈکشن ہاؤس کھولا اور ساتھ ہی گلوکاری کا آغاز بھی کردیا۔ شاعرہ رائے اس وقت متعدد گانے ریلیز کر چکی ہیں جب کہ وہ کئی منصوبوں میں ماڈلنگ بھی کرچکی ہیں۔ ان کا ایک گانا ’رات’ بولی وڈ فلم گھوسٹ میں شامل کیا گیا۔ جبکہ وہ اپنے ایک اور گانے ‘کملی’ میں اداکار محسن عباس حیدر کے ساتھ جلوے بکھیرتی نظر آئیں۔

شاعرہ رائے 2021ء میں پاکستان کی پہلی مس ٹرانس بیوٹی کوئین بھی بن چکی ہیں، خیال رہے کہ مس ٹرانس پاکستان کا یہ مقابلہ کینیڈا میں ہوا تھا جس کے فائنل مقابلے میں شاعرہ رائے نے 10 شرکاء کو ہرا کر مس پاکستان بیوٹی کوئین کا اعزاز اپنے نام کیا تھا۔ اس مقابلے کو جیتنے کے بعد ان کی تاج پوشی کی تقریب لاہور میں منعقد ہوئی تھی جس میں پاکستان کے ساتھ دبئی سے آئی ہوئی نامور میک اپ آرٹسٹ اور شوبز اسٹارز نے شرکت کی تھی۔ اس موقع پر شاعرہ رائے کا کہنا تھا کہ پاکستان کی پہلی بیوٹی کوئین بننے کی بڑی خوشی ہے، میری کامیابی ثابت کرتی ہے کہ یہ ٹرانس جینڈر بھی کسی سے کم نہیں ہیں۔