سعودی عرب کا ثقافتی شہر ‘العلا’ دنیا کے سات عجائب میں شامل

سعودی عرب کے شمال میں واقع ثقافتی و تاریخی شہر العلا کو 2023ء کے دنیا کے سات عجائب میں شامل کرلیا گیا ہے۔ تاریخی اور ثقافتی ورثہ ہونے کے باوجود کچھ عرصہ پہلے تک اس جگہ کے متعلق جزیرہ نما عرب سے باہر بہت کم لوگ جانتے تھے یا بہت کم لوگوں نے اس جگہ کو دیکھ رکھا تھا۔

سال 2023ء کے عجائب کی فہرست مرتب کرنے والے ایوارڈ یافتہ سفرنامہ نگار آرون مِلر کے مطابق جب 2022ء کے آخر میں اس جگہ کو سرکاری طور پر سیاحوں کے لیے کھولا گیا تو عرب کی 2 لاکھ برس پُرانی تاریخ سامنے آئی۔ العلا سعودی عرب کے شمال مغربی صحرا میں واقع ہے جس زیادہ تر حصہ ابھی بھی غیر دریافت شدہ ہے۔ ایک اندازے کے مطابق اس علاقے کا صرف 5 فی صد حصہ کی کھدائی کی گئی ہے۔

العلا کے ساتھ آرون مِلر نے فرانس کے مونٹ سینٹ مائیکل، ارجنٹینا کے پیریٹو مورینو گلیشیئر، بھوٹان کے ٹائیگرز نیسٹ مونیسٹری، ترکیہ کے کیپاڈوچیا، برطانئی کی لیک ڈسٹرکٹ اور جنوبی افریقا کی سارڈائن رن کو 2023 کے سات عجائب کی فہرست میں شامل کیا۔

یہاں بتاتے چلیں کہ دنیا کے سات عجائبات کی اولین فہرست دو ہزار سال قبل مرتب کی گئی تھی۔ اس فہرست میں اہرام مصر، بابل کے معلق باغات، زیوس کا دیو ہیکل مجسمہ، آرتمیس کا معبد، موسولس کا مقبرہ، روڈس کا قد آور مجسمہ اور اسکندریہ کا روشن مینار شامل تھے۔ ایک طویل عرصے تک عجائبات کی یہ فہرست قائم رہی تاہم 2000ء میں سوئٹزرلینڈ کی ایک فاؤنڈیشن نے دیکھا کہ مذکورہ سات عجائبات میں سے چھ عجائبات تو زمانے کی دست و برد (یعنی زلزلوں اور آتشزدگی) کا شکار ہوچکے ہیں اور صرف اہرام مصر باقی ہیں۔

زیورخ سوئٹزرلینڈ میں واقع اس فاؤنڈیشن نے دنیا کے سات عجائبات کی فہرست کو از سر نو مرتب کرنے کا فیصلہ کیا اور اس سلسلے میں عوامی رائے حاصل کرنے کا اہتمام کیا۔ اس سلسلے میں دس کروڑ سے زائد افراد کی رائے شامل کی گئی اور بالآخر 2007 میں دنیا کے نئے سات عجائبات کا اعلان کیا گیاجو اس وقت کرہ ارض پر موجود ہیں جن ان کی مختصر تفصیل کچھ یوں ہے ؛ عظیم دیوارِ چین، کرائسٹ دی ریڈیمر-برازیل، چیچن اٹزا۔میکسیکو، پیٹرا-اردن، روم-اٹلی میں واقع دنیا کا سب سے قدیم ایمفی تھیٹر(کولوزیم)، ماچو پیچو-پیرو، تاج محل-آگرہ ہے۔

مزید پڑھیں: سعودی ریسٹورنٹ جہاں کھانے کے ساتھ ڈرایا بھی جاتا ہے

علاوہ ازیں ، سعودی عرب کے میں واقع مسجد نبوی اپنی تاریخی اور مذہبی حیثیت کے باعث دنیا کی خوبصورت ترین مساجد میں شمار ہوتی ہے۔۔شاندار طرزِ تعمیر اور جدید ترین ٹیکنالوجی سے بنائی گئی اس عمارت کی ہر چیز انتہائی خوبصورت ہے اور ہر طرح سے دلکش ہے۔ ہر سال حج کے موقع پر دنیا بھر سے آئے لاکھوں کی تعدادمیں مسلمان اس مسجد کے احاطوں میں جمع ہوکر رب کریم کی بارگاہ میں سجدہ ریز ہوتے ہیں۔خانہ کعبہ کے بعد مسجدِ نبوی دنیا بھر کے مسلمانوں کے لیے اہم ترین مقدس مقام ہے۔