سرد اور خشک موسم میں بالوں کی حفاظت کے 6 طریقے

ہم سبھی کو موسم سرما کا بے حد انتظار ہوتا ہے، اس موسم کی سوغات سے سب ہی لطف اندوز ہوتے ہیں لیکن یہ سردیاں اپنے ساتھ کچھ مسائل بھی ساتھ لاتی ہیں۔سردیوں کا موسم سرد اور خشک ہوتا ہے ۔پھر اس موسم میں گھر کے اندر اورباہر کا موسم مختلف ہوتا جس کی وجہ سے بالوں کی قدرتی چمک اور لچک متاثر ہوتی ہے. طرح سر میں خشکی ہونا ،اور بالوں کے سرے پھٹ جانا یا زیادہ بال گرنا بھی سردی کے موسم کی عام شکایت ہے ۔سرد اور خشک ہواؤں کی وجہ سے سر کی نمی ختم ہوجاتی ہے جس سے بال خشک اور روکھے ہوجاتے ہیں ۔اس کے علاوہ گرم کپڑے بھی بالوں کی صحت پر اثر انداز ہوتے ہیں۔

تاہم ماہرین کا کہنا ہے کہ گرمی کے مقابلے میں سردی کا موسم بالوں اور جلد کے لئے زیادہ صحت بخش ہوتا ہے ۔لیکن پھر بھی اس موسم میں جلد کے ساتھ ساتھ بالوں کے بھی بے شمار مسائل جنم لینا شروع ہوجاتے ہیں، آج ہم آپ کو موسم سرما میں بالوں کے مسائل اور ان کے حل کے بارے میں بتائیں گے۔

بالوں کی حفاظت کے 6 طریقے

زیتون کے تیل کی مالش

سردی کے موسم میں درجہ حرارت کی کمی اور ٹھنڈی ہوائیں بالوں کی نمی ختم کردیتی ہیں۔اسی طرح گھر میں گرم ہوا بھی بالوں کے لئے نقصان دہ ہوتی ہے ۔اس لئے ضروری ہے کہ بالوں کی نمی کو محفوظ کیا جائے ۔زیتون کا تیل بالوں کی نمی بڑھانے اور سکون بخشنے کے لئے بہترین ہے ۔زیتون کے تیل کو ہلکا سا گرم کرکے بالوں اور سر میں لگا کر ہلکا ہلکا مساج کریں ۔بالوں کی نمی برقرار رکھنے کے لئے ہر دفعہ شیمپو کرنے سے پہلے لگائیں۔

جلدی جلدی شیمپو نہ کریں

سردیوں میں جلدی جلدی نہانا ویسے ہی مشکل لگتا ہے لیکن آپ کو یہ جان کر خوشی ہوگی کہ بالوں کو کم دھونا ہی بالوں کی صحت کے لئے مفید ہے۔بالوں کو جلدی جلدی دھونے سے سر کا قدرتی تیل ختم ہو جاتا ہے اور سر میں خشکی ہوجاتی ہے۔سردی کے موسم میں بالوں کو ہفتے میں ایک یا دو مرتبہ دھوناکافی ہوتا ہے کیونکہ سردی میں پسینہ نہیں آتا جس کی وجہ سے بال چکنے بھی نہیں ہوتے۔

شہد کا ماسک لگائیں

شہدبالوں کے لئے قدرتی ماسک کا کام دیتا ہے۔یہ نہ صرف بالوں کی نمی کو واپس لاتا ہے بلکہ بال گھنے بھی نظر آتے ہیں ۔بالوں کی لمبائی میں شہد لگائیں اور 20 منٹ بعد نیم گرم پانی سے دھولیں، اس سے بال چمکدار اور گھنے لگیں گے۔

بالوں کو گرماہٹ سے بچائیں

تیز گرم پانی کا شاور ہو یا بالوں کا اسٹائل بنانے والے گرم اوزار تمام چیزیں بالوں کو نقصان پہنچاتی ہیں ۔بالوں پر استعمال ہونے والے گرم اوزاروں کا استعمال کم سے کم کریں ۔زیادہ گرمائی سے سر میں خشکی ہوجاتی ہے جس کی وجہ سے بال کمزور ہو کر جھڑنے لگتے ہیں ۔خشکی کی وجہ سے سر میں خارش بھی ہوجاتی ہے۔

ہیئر پروڈکٹس کا استعمال

ہم  بغیر سوچے سمجھے بالوں کے تیل، شیمپو، کنڈیشنر اور دیگر بالوں کی حفاظت کے لئے بہت سی مصنوعات استعمال کرتے ہیں۔بالوں کی ضروریات کے مطابق بالوں کے لیے صحیح پروڈکٹ کا انتخاب بالوں کے گرنے کو روکنے کا ایک اہم حصہ ہے۔ مثال کے طور پر، اگر آپ کے بال خشک ہیں، تو ایسی مصنوعات کا انتخاب کریں جو  ڈیپ کنڈیشنگ فراہم کریں۔

گیلے بالوں کیساتھ باہر نہ جائیں

سردی میں بال سوکھنے میں وقت لگتا ہے،درجہ حرارت کم ہونے کی وجہ سے ہوا میں بھی بال نہیں سوکھ پاتے اور نہ ہی آپ ان کے سوکھنے کا انتظار کر پاتے ہیں ۔لیکن پھربھی گیلے بالوں کے ساتھ گھر سے نکلنے کی غلطی ہرگز نہ کریں ۔کیونکہ باہر کا سرد موسم بالوں کی جڑوں میں موجود پانی کو جما دیتا ہے جس سے بال ٹوٹنے لگتے ہیں ۔سردی میں بال گرنے کی ایک وجہ یہ بھی ہوتی ہے۔اس لئے بہتر ہوگا کہ بالوں کو ایک دن پہلے دھولیں یا اگر جلدی ہو تو ڈرائر کا استعمال کرلیں۔

مزید پڑھیں: خوبصورت نظر آنے کیلئے کونسی غذائیں اپنی ڈائٹ کا حصؔہ بنائیں؟

اس کے علاوہ اپنی خوراک میں ضروری وٹامنز، اور دیگر غذائی اجزاء کی کمی  بھی بالوں کے گرنے کا سبب بن سکتی ہیں اس لیے زیادہ سے زیادہ صحت مند چیزیں کھائیں ۔وٹامن ای اور بی  اور پروٹین کا استعمال کریں  یہ بالوں کی صحت کو برقرار رکھنے میں مدد کرتے ہیں۔اس بات کو یقینی بنائیں کہ آپ سرد موسم میں ضرورت کے مطابق سبزیاں اور پروٹین کا استعمال کرتے ہیں ،گوشت، دہی، مچھلی کھانے سے بالوں کی نشوونما ہوتی ہے اور بالوں کے گرنے پر قابو پایا جاسکتا ہے۔اس کے علاوہ صحت مند خوراک جتنی ضروری ہے اتنا ہی پانی بھی ہمارے جسم کیلئے نہایت اہم ہے، موسم سرما میں پانی کم پیا جاتا ہے ، بالوں کی گرنے کی ایک وجہ یہ بھی ہے۔اس لیے سردی کے موسم میں بھی پانی کا زیادہ استعمال کریں تاکہ آپ کی جلد اور بال دونوں ہی اس موسم میں ٹھیک رہیں۔