صحیفہ جبار خٹک نے ناک میں تکلیف کے باعث سرجری کروالی

صحیفہ جبار خٹک ڈرامہ انڈسٹری کی ایسی باصلاحیت اداکارہ ہیں جنہوں نے بطور ماڈل اپنے کیریئر کا آغاز کیا اور ڈرامہ سیریل ‘بیٹی’ میں اپنی شاندار اداکاری پر بیسٹ ایمرجنگ ٹیلنٹ پر لکس اسٹائل ایوارڈ بھی حاصل کیا۔ حال ہی میں اداکارہ نے سوشل میڈیا پر اس بات کا انکشاف کیا ہے کہ بعض طبی پیچیدگیوں کے سبب انہوں نے دو ماہ قبل ناک کی پلاسٹک سرجری کروائی تھی۔

ڈرامہ سیریل “لوگ کیا کہیں گے” کی اداکارہ نے انسٹاگرام پر ناک کی سرجری کی تصاویر شیئر کرتے ہوئے آپریشن کے بعد میں آنے والی مشکلات اور اس سے قبل کے خدشات اور خوف سے متعلق بھی مداحوں کو بتایا۔ صحیفہ جبار خٹک نے بتایا کہ ان کے ناک کی درمیان والی ہڈی بڑھ گئی تھی، جس وجہ سے ان کی ایک سائیڈ تنگ ہوچکی تھی اور انہیں سانس لینے میں بھی مشکلات درپیش تھیں۔

ادکارہ صحیفہ جبار خٹک کے مطابق انہیں کچھ عرصہ قبل ڈاکٹرز نے بتایا کہ انہیں ’ڈیویئیٹڈ سیپٹم‘ کا مسئلہ لاحق ہے اور اس کے حل کے لیے ان کا آپریشن کیا جائے گا۔ اداکارہ کا کہنا تھا کہ انہیں ہمیشہ سے ہی آپریشن سے ڈر لگتا رہا ہے اور وہ نہیں چاہتی تھیں کہ اپنے جسم پر قینچی چلتی دیکھیں، تاہم ان کے پاس اور کوئی راستہ نہیں تھا۔

اپنی پوسٹ میں انہوں نے لکھا کہ وہ گزشتہ 11 سال سے مذکورہ پیچیدگیوں میں مبتلا تھیں، ان کے ناک سے خون بہتا تھا جب کہ سردیوں میں پرسکون زندگی گزارنا ان کے لیے مشکل بن جاتا تھا۔ اداکارہ نے بتایا کہ گزشتہ سال ماحولیاتی آلودگی کی وجہ سے انہیں شدید تکلیف ہوئی اور انہیں سانس لینے میں مشکلات پیش آئیں، جس کے بعد انہوں نے مجبوری کے تحت سرجری کروانے کا فیصلہ کیا مگر انہیں آپریشن سے ڈر بھی لگ رہا تھا۔

انہوں نے کامیاب کاسمٹک سرجری ہونے پر خدا کے شکرانے ادا کیے اور ساتھ ہی اعتراف کیا کہ ان کے خدشات اور خوف بلا جواز تھا، ایسا کچھ بھی نہیں ہوا، جیسا انہوں نے سوچا تھا۔ صحیفہ جبار کے مطابق ناک کی کاسمیٹک سرجری خود اتنا پیچیدہ عمل نہیں ہے، تاہم اس کے بعد کے کچھ ایام کافی دردناک ہوتے ہیں اور وہ بھی دو ہفتوں تک بسترے سے چپکی رہیں جب کہ انہیں سانس میں بھی مشکلات پیش آئیں۔

صحیفہ جبار نے واضح کیا کہ انہوں نےخوبصورت بڑھانے کے لیے ناک کی پلاسٹک سرجری نہیں کروائی۔اپنی پوسٹ میں یہ بھی لکھا کہ ناک کی سرجری کروانے اور پلاسٹک سرجری کے حوالے سے پاکستان میں بہت سارے غلط تصورات پائے جاتے ہیں، ساتھ ہی انہوں نے لکھا کہ صحت مند زندگی گزارنے کے لیے پلاسٹک سرجری کروانے میں کوئی عیب نہیں۔

اپنی پوسٹ میں اداکارہ نے لکھا کہ پاکستان میں طبی پیچیدگیوں کو خوبصورت انداز میں پلاسٹک سرجری کے ذریعے حل کروانے کو عیب سمجھا جاتا ہے اور ایسا کرنے والوں کو شرمندہ کرنے کی کوشش کی جاتی ہے۔

ایسا بلکل نہیں ہے کہ پلاسٹک سرجری صرف خوبصورتی بڑھانے کے لیے کروائی جاتی ہے بلکہ اس سے کئی طبی پیچیدگیوں کو احسن انداز مین ٹھیک کروانے کی کوشش کی جاتی ہے۔ ساتھ ہی انہوں نے اپنے ڈاکٹر کو بھی مینشن کیا اور لوگوں سے کہا کہ وہ ان کی سرجری سے متعلق ڈاکٹر سے رجوع کر سکتے ہیں۔

اداکارہ کی جانب سے کی گئی اس پوسٹ پر کئی مداحوں نے کمنٹس کیے جن میں سے زیادہ تر نے ان کی بہادری کی تعریف کی، تاہم بعض نے ان پر خوبصورتی بڑھانے کے لیے ناک کی پلاسٹک سرجری کروانےکا الزام بھی لگایا۔