قوت سماعت سے محروم حسان احمد پاکستان کے پہلے“ڈیف وی لوگر“ بن گئے

یہ کہنا بجا ہوگا کہ یہ سوشل میڈیا کا دور ہے، آج کی تیز رفتار دنیا میں سوشل میڈیا ایک ایسا پلیٹ فارم بن گیا ہے جس کی اہمیت سے انکار ممکن نہیں کیونکہ اس نے اُن لوگوں کی صلاحیتوں کو بھی اُجاگر کیا جنہیں ہمارے معاشرے میں اکثر فراموش یا پھر نظر انداز کیا جاتا ہے۔

ان فراموش اور نظر انداز کئے جانے والے لوگوں میں ایک طبقہ معزور افراد بلخصوص معزور نوجوانوں کا ہے جن کے پاس بےپناہ صلاحیتیں ہوتی تاہم وسائل کی کمی ان کی صلاحیتوں میں ایک بڑی رکاوٹ بن جایا کرتی تھی۔ خاص کر وہ معذور افراد جو بولنے یا سُننے کی صلاحیت سے محروم ہیں۔ ان کے پاس اپنے آپ کو منوانے کے لئے دیکھا جائے تو اب دنیا بھر میں بہت سے سہولیات آگئیں ہیں تاہم ایسے افراد کے پاس آگاہی کی کمی ہے ورنہ وہ اب کسی کے محتاج نہیں ہے۔

دوسری جانب ایسے معذور افراد جن کے پاس ٹیلنٹ ہے اور کسی چیز کو بہت اچھے سے کرسکتے ہیں، تو سماجی رابطے کی ویب سائٹس ان کے پاس ایک بہترین پلیٹ فارم ہے، جہاں وہ بھی تفریحی مواد سے ناصرف لطف اندوز ہوسکتے ہیں بلکہ ساتھ ہی ان پیلٹ فارم کا استعمال کرکے اپنے آپ کو منوا بھی سکتے ہیں۔

اگر پاکستان کی ہی بات کرلی جائے تو یہاں ٹیلنٹ کی کمی نہیں ، ہمارے نوجوان باہمت بھی ہیں اور صلاحیتوں سے مالا مال بھی بات صرف درست سمت کے تعین کی ہے۔ حسان احمد کا شمار بھی ایسے ہی نوجوان میں ہوگا جنھوں نے اپنی سمت کا درست تعین کیا، اپنی ذہانت کو بروۓ کار لاتے ہوئے قوت ِسماعت سے محروم افراد کیلئے تفریح پہنچانے کا ذمہ اٹھایا ہے اوراپنے ٹیلنٹ سے آج پوری قوم کا سرفخر سے بلند کردیا ہے۔

حسان احمد پاکستان کے پہلے نوجوان “ڈیف وی لوگر“ ہیں۔ یہ پاکستان میں اپنی نوعیت کے پہلے وی لوگر ہے، ان کے ویلاگز میں مزاحیہ ویڈیوز ، فوڈ ریویوز اور شاپنگ ریویوز کے ساتھ دیکھنے والوں کو بہت ساری معلوماتی آگاہی فراہم کی جاتی ہے۔ اس کے علاوہ ان ویڈیوز سے پورا سال اہم اپ ڈیٹس تک رسائی بھی حاصل کی جاسکتی ہے۔

ناصرف یہ بلکہ حسان احمد ڈیف ٹاک نامی ایک فلاحی ادارے کے برانڈ امبیسیڈر کی حیثیت سے بھی کام کررہے ہیں۔ حالیہ دنوں میں اس فلاحی ادارے کے توسط سے انہوں نے اپنے وی لوگ سے عالمی وباء کرونا وائرس سے بچاؤ پر مبنی ویڈیو شئیر کی جس کے ذریعے سماعت سے محروم افراد وبائی امراض سے متعلق احتیاطی حفاظتی اقدامات سیکھ سکتے ہیں۔

بلاشبہ حسان احمد کی یہ کوشش قابلِ ستائش ہے ،وہ پاکستان میں اپنے وی لوگ کے ذریعے ان لوگوں کو تفریح فراہم کررہے ہیں جو واقعی اس کے حقدار ہیں۔ حسان احمد کی شخصیت آج پوری قوم کے لئے کسی رول ماڈل سے کم نہیں ہے۔

Credit: Images.dawn.com