لانگ جمپ لگانے والے محمد آصف بقیہ تربیت پاکستان آرمی سے لیں گے

کہتے ہیں اللہ پر یقین کامل ہو، تو انسان پھر کبھی اور کسی بھی مقام پر ناامید یا مایوس نہیں ہوسکتا ہے۔ مشکل سے مشکل وقت بھی بہتر انداز میں گزر ہی جاتا ہے جبکہ قسمت کا کیا ہے وہ بدلنے میں دیر نہیں لگتی ہے، انسان محنت سے کام لیتا رہے تو ایک نہ ایک دن قسمت بدل ہی جاتی ہے۔

ایسا ہی ایک قصہ ٹھٹھہ کے نوجوان محمد آصف کا بھی ہے جس کی کچھ عرصہ قبل سوشل میڈیا پر ایک ویڈیو وائرل ہوئی تھی جس کے بعد ناصرف لوگوں کی جانب سے آصف کو بہت پذیرائی ملی بلکہ ابتداء میں تو لوگوں کی جانب سے آصف کی تلاش شروع ہوگئی کہ آخر کون ہے یہ نوجوان، کیوں کہ یہ پورے ملک کا ایک اثاثہ ہے اور آگے جاکر پورے ملک کا نام روشن بھی کرسکتا ہے۔

یہی نہیں اندرون سندھ کے قدیم ترین شہر ٹھٹھہ سے تعلق رکھنے والے محمد آصف جنہوں نے اپنی وائرل شدہ ویڈیو میں لائن میں کھڑی 11 موٹر سائیکلوں کے اوپر سے چھلانگ لاگئی تھی۔ ان کی پہلے تو تلاش ختم ہوئی جب لوگوں نے ان سے رابطہ کیا اور وہ منظر عام پر آئے۔ جہاں انہوں نے خواہش ظاہر کی کہ وہ پاکستان کی نمائندگی اولمپکس گیمز میں کرنا چاہتے ہیں اور ملک کے لئے لانگ جمپ میں تمغہ جیت کر لانا چاہتے ہیں۔

بعدازاں ان کی پروفیشنل مہارت کو دیکھتے ہوئے پاکستان ایتھلیٹس فیڈریشن کے صدر میجر جنرل (ر) اکرم ساہی نے انہیں لاہور بلالیا تھا اور اب ایک انتہائی بڑی خبر سامنے آئی ہے کہ مملکتِ خداداد کے زمینی دفاع کی ضامن پاکستان آرمی نے اب محمد آصف کو طلب کرلیا ہے۔

تفصیلات کے مطابق ٹھٹہ سے تعلق رکھنے والے لانگ جمپ کے ماہر محمد آصف کے مشکل وقت گویا اب ختم ہونے کو ہے۔ اب انھیں بس محنت کرنا ہوگی کیونکہ اب وہ اپنی بقیہ پروفیشنل ٹریننگ پاکستان آرمی کے ماہر کوچیز کے ساتھ کریں گے اور ملک و قوم کے لئے دیکھے جانے والے خواب یعنی اولمپکس گیمز میں پاکستان کی نمائندگی کے خواب کو بھی جامع تکمیل تک لے جانے کی بھرپور کوشش کریں گے۔

اس حوالے سے مزید جانئے : نو سالہ نتالیہ نجم کا بڑا کارنامہ

دوسری جانب ایتھلیٹک فیڈریشن آف پاکستان کے صدر میجر (ر) اکرم ساہی کا اس حوالے سے کہنہ ہے کہ سوشل میڈیا پر جاری کردہ ویڈیو سے شہرت پانے والے محمد آصف کی تمام تر تربیت کی ذمہ داری اب پاکستان آرمی نے لے لی ہے اور وہ اب جلد پاکستان آرمی کی ٹیم کو جوائن کریں گے ساتھ ہی انہوں نے مزید بتایا کہ آرمی کے ساتھ ساتھ پاکستان ایتھلیٹک فیڈریشن بھی محمد آصف کی بھرپور مدد اور تعاون کرے گی۔