مولانا طارق جمیل نے اپنی طبعیت کے بارے میں آگاہ کردیا

پاکستان کے معروف عالم دین مولانا طارق جمیل کو گزشتہ روز دل کا دورہ پڑنے پر کینیڈا کے اسپتال میں داخل کیا گیا تھا، تاہم انہوں نے اپنی تصویر کے ساتھ ٹوئٹ کرکے مداحوں کو خیریت سے آگاہ کیا۔

سماجی رابطے کی ویب سائٹ ٹوئٹر پر مولانا طارق جمیل نے اسپتال کے بیڈ بیٹھے ایک تصویر شیئر کی اور لکھا کہ اللہ کے فضل اور آپ احباب کی دعاؤں سے اب طبیعت قدرے بہتر ہے۔تین دن مزید اسپتال میں ڈاکٹرز کے زیرِ نگہداشت رہنے کے بعد انشاء اللہ ڈسچارج کردیا جائے گا۔

اس موقع پر مولانا طارق جمیل نے اپنے چاہنے والوں اور تمام لوگوں سے صحت یابی کے لئے مزید دعاؤں کی درخواست بھی کی ہے۔

دوسری جانب طارق جمیل کے صاحبزادے یوسف جمیل نے بھی والد کی طبیعت کے حوالے سے اپنے ٹویٹ میں بتایا کہ ان کے والد کی طبعیت اب بہتر ہے لیکن ڈاکٹر انہیں ابھی مزید کچھ دن اسپتال میں رکھنا چاہتے ہیں۔ایک ٹوئٹ میں یوسف جمیل کا کہنا تھا کہ محترم مولانا طارق جمیل صاحب اب بہت بہتر ہیں۔ مولانا طارق جمیل کو اس سے قبل جنوری 2019ء میں بھی دل کا دورہ پڑا تھا جس کے بعد انہیں لاہور کے مقامی اسپتال منتقل کیا گیا تھا، تاہم انہیں انجیو گرافی کے بعد گھر جانے کی اجازت دے دی گئی تھی۔

خیال رہے کہ مولانا صاحب فرقہ واریت جیسی تمام چیزوں کے سخت خلاف ہیں۔ ساتھ ہی مولانا طارق جمیل کو “دی مسلم 500” کے ایڈیشن میں مقبول ترین مقررین کی فہرست میں نمایاں حیثیت کے ساتھ شامل کیا گیا تھا۔مولانانے اپنی ساری زندگی اسلام کے لئے وقف کردی ہے اور وہ ہر دور حکومت کے ساتھ مل کر پاکستان کی عوام کی فلاح و بہبود کے لئے بھی کام کرتے رہے ہیں۔جبکہ ان کے علم وفصاحت سے بھرپور لیکچرز تاجروں سے لے کر منسٹروں ، اداکاروں اور کھیلوں کی مشہور شخصیات تک کو متاثر کرنے میں بہت کارگر ثابت ہوئے ہیں اور مختلف شعبۂ زندگی کی مشہور شخصیات اب ان کے ساتھ تبلیغ اسلام میں شانہ بشانہ کام کررہی ہیں۔ان شخصیات میں سرفہرست نام مرحوم جنید جمشید کا بھی تھا جن کی پہچان گلوکار سے بدل کر مبلغ اور نعت خواں کی ہوگئی تھی۔

مزید پڑھیں: مولانا طارق جمیل کا ایک سنگر سے دینی مبلغ تک کا سفر

مزید برآں، مولانا صاحب کی خاصیت یہ ہے کہ ان کا طرز بیان اور انداز ِ گفتگو دلوں کو گرماجاتاہے۔وہ کمال کا حافظہ رکھنے کیساتھ عمومی طور پر ہمہ وقت چہرے پر ایک خوبصورت اور دل آویز مسکراہٹ بھی سجائے رکھتے ہیں جبھی انٹرنیٹ پر بھی ان کی دینی ویڈیوز دنیا بھر میں سنی جاتی ہیں۔ان کی دینی خدمات کی بدولت پاکستانی حکومت نے ان کو گزشتہ برس ’پرائڈ آف پرفارمنس‘ ایوارڈ سے نوازا تھا۔