ماڈل قندیل بلوچ کے قتل کے ملزم محمد وسیم کو بری کر دیا گیا

لاہور ہائی کورٹ (ایل ایچ سی) نے پیر کو ماڈل قندیل بلوچ کے قتل کے مرکزی ملزم محمد وسیم کو سیشن عدالت کی جانب سے سنائی گئی عمر قید کی سزا کو ختم کرتے ہوئے بری کر دیا۔

تفصیلات کے مطابق سال 2016 میں اپنی موت سے پہلے، 26 سالہ قندیل بلوچ اپنی سوشل میڈیا پوسٹس کے لیے مشہور ہوئیں تھیں، جنہیں بہت سے لوگ نازیبا اور غیر اخلاقی سمجھتے تھے۔

اس حوالے سے مقتولہ کے بھائی محمد وسیم کو گرفتار کیا گیا تھا اور بعد میں اسے ٹرائل کورٹ نے گلا دبانے کے جرم میں عمر قید کی سزا سنائی تھی۔ یہی نہیں میڈیا سے بات کرتے ہوئے ملزم نے موقف اپنایا تھا کہ اسے اس قتل پر کوئی پچھتاوا نہیں ہے کیونکہ اس کا رویہ “ناقابل برداشت” تھا۔

بعدازاں ملزم وسیم نے سال 2019 میں اپنے قتل کی سزا اور عمر قید کے خلاف اپیل دائر کی تھی۔ ان کے وکیل سردار محبوب نے مزید تفصیلات بتائے بغیر خبر رساں ادارے اے ایف پی کو بتایا کہ مشرقی شہر ملتان کی ایک عدالت نے انہیں مکمل طور پر بری کر دیا ہے۔

عدالتی حکم نامے کو عام کرنا ابھی باقی ہے۔ ایک سرکاری وکیل نے بری ہونے کی تصدیق کی۔ توقع ہے کہ وسیم کو اس ہفتے کے آخر میں رہا کر دیا جائے گا۔

انہوں نے مزید کہا کہ اس کی والدہ نے بھی عدالت میں بیان جمع کرایا تھا کہ انہوں نے اسے معاف کر دیا ہے۔ یہ واضح نہیں تھا کہ عدالت نے اپنے فیصلے میں والدہ کے بیان پر غور کیا یا نہیں۔ پاکستان میں “غیرت کے نام پر قتل” سے متعلق قوانین میں بنیادی ترمیم یہ تھی کہ کسی کو صرف خاندان کے کسی فرد کی طرف سے معافی کی بنیاد پر رہا نہیں کیا جا سکتا ہے۔

خبر کے وائرل ہونے کے فوراً بعد بہت سے لوگوں نے سوشل میڈیا پر آکر عدالت کے فیصلے پر صدمے کا اظہار کیا اور وسیم کی رہائی کی مذمت کی۔

سال 2016 میں ایک نیوز کانفرنس میں ملزم محمد وسیم نے اعتراف کیا تھا کہ اس نے اپنی 26 سالہ بہن کا سوشل میڈیا پر سرگرمیوں کی وجہ سے گلا گھونٹ دیا تھا۔ قتل میں مبینہ طور پر ملوث ہونے کے الزام میں گرفتار مفتی عبدالقوی کو بعد میں رہا کر دیا گیا تھا۔ پولیس کا کہنا ہے کہ ان کا قتل سے کوئی تعلق نہیں پایا گیا ہے۔

واضح رہے قندیل بلوچ نے فیس بک پر کئی بولڈ پوسٹس کی تھیں، جس میں انہوں نے پاکستان میں لوگوں کی “دقیانوسی سوچ” کو تبدیل کرنے کی کوشش کرنے کی بات کی تھی۔ جس پر انہیں اکثر نازیبا کلمات اور جان سے مارنے کی دھمکیوں کا سامنا کرنا پڑتا تھا لیکن اشتعال انگیز تصاویر اور ویڈیوز پوسٹ کرنا جاری رکھا۔

یاد رہے ماڈل قندیل بلوچ کے اچانک قتل کی خبر نے پورے پاکستان میں لوگوں کو حیرت میں مبتلا کر دیا تھا۔ سوشل میڈیا پر کئی مارفین کا ماننا تھا کہ اگرچے وہ ماڈل کے مواد کو شدید ناپسند کرتے تھے لیکن انہیں غیرت کے نام پر قتل کا حق کسی کو حاصل نہیں ہے۔ حکومت کو مجرمان سے سختی سے نمٹنا چاہئے۔