عراق: دولہا کو گانا پسند نہیں آیا، شادی کے دن طلاق دیدی

گزشتہ کچھ سالوں کے دوران دنیا بھر میں طلاق کی شرح میں بے پناہ اضافہ ہوا اور گھریلو ناچاقی میں ریکارڈ اضافہ دیکھا گیا ہے جس کے باعث دنیا بھر سے خواتین عدالتوں میں طلاق کے دعوے دائر کرتی دکھائی دے رہی ہیں۔ دنیا میں شاید ہی کوئی میاں بیوی ایسے ہوں کہ جن کے درمیان نوک جھونک نا ہوتی ہو مگر بعض واقعات میں دونوں کی یہ نوک جھونک تکرار کی صورت اختیار کرلیتی ہے اور نوبت طلاق تک پہنچ جاتی ہے لیکن عراق میں طلاق کے حوالے سے اپنی نوعیت کا انوکھا واقعہ پیش آیا ہے۔ جس میں دولہا نے شادی کے دن دوران تقریب دلہن کو طلاق دیکر تیز ترین طلاق کا ریکارڈ قائم کرکے سب کو حیران کردیا۔

غیر ملکی میڈیا رپورٹ کے مطابق اس عراقی دولہا نے اپنی دلہن کو ناپسند گانے پر رقص کرنے پر طلاق دی۔ عراق کے شہر بغداد میں شادی کی اس تقریب کے دوران دلہن نے شامی گانے ‘مسیطرہ’ پر رقص کیا، اس گانے کے لیرکس میں کچھ ایسے الفاظ شامل تھے جو دولہا اور اس کی فیملی سے برداشت نہ ہوئے جس پر دولہا نے غصے میں طلاق دیدی۔

دراصل اس شامی گانے کے الفاظ کچھ یوں تھے (میں تمہیں کنٹرول کروں گی اور تم پر غالب آجاؤں گی) جبکہ اس گانے کا پہلا بول یہ تھا کہ ‘تم میری کی گئی سخت ہدایات پر چلو گے’۔ یہ سنتے ہی دولہا کی فیملی آگ بگولہ ہوگئی ، دولہا اور دلہن کے درمیان تقریب میں ہی بحث شروع ہوئی جس کا اختتام طلاق پر ہوا۔

ہر لڑکی کی طرح اس عراقی دلہن کی بھی خواہش ہوگی کہ وہ اپنی شادی کے دن کچھ منفرد کرے تاکہ اس کی زندگی کا یہ خاص دن یادگار رہے لیکن اس دلہن کو کیا معلوم تھا کہ اپنی شادی کے دن یہ گانا چننا اور اس پر ڈانس کرنا اسے مہنگا پڑجائے گا۔ میڈیا رپورٹس میں یہ بھی بتایا گیا ہےکہ اس گانے پر طلاق کا یہ پہلا واقعہ نہیں بلکہ اس سے قبل بھی اردن میں ایک شخص نے اس گانے پر شادی کے روز اپنی دلہن کو طلاق دی تھی۔

بعض اوقات لوگ عجیب وغریب وجوہات پر اپنی بیویوں کو طلاق دے دیتے ہیں۔ جیسے گزشتہ دنوں اسی نوعیت کا ایک واقعہ مصر میں پیش آیا ہے ، جس میں ایک 30 سالہ شوہر نے اپنی 22 سالہ بیوی کی پڑوسیوں کے کپڑے چُرانے کی عادت سے تنگ آکر طلاق کا مقدمہ دائر کیا۔

مزید پڑھیں: شادی میں دلہن کی اسلحے کے ساتھ انٹری

مصری شخص نے درخواست میں مؤقف اختیار کیا کہ اس کی بیوی جب گھومنے جاتی تھی تو پڑوسی خاتون کے کپڑے ادھار لیتی تھی لیکن پھر انہیں واپس نہیں کرتی تھی۔ شوہر نے اہلیہ پر الزام عائد کیا کہ بیوی نے یہ دھمکی بھی دی کہ اگر پڑوسی کپڑے واپس مانگیں گے تو وہ ان کو مارے گی۔ شوہر کا کہنا تھا کہ پڑوسی نے مجھے روکا اور کہا کہ آپ کی اہلیہ کپڑے واپس نہیں کرتیں ہم پولیس کو رپورٹ کریں گے اس لیے میں نے پڑوسیوں کو نئے کپڑے خرید کر دئیے تاکہ قانونی مسائل سے بچا جاسکے لیکن پھر بھی اہلیہ نے ان لوگوں کی پٹائی کی۔ اس پر شوہر اہلیہ کے گھر گیا اور اس سے طلاق مانگی لیکن اس نے انکار کردیا۔