ہانیہ عامر کے گھر مداحوں کو پکڑنے کیلئے پولیس آئی؟ اداکارہ کا حیران کن انکشاف

ہر ایک انسان کی ایک نجی اور ذاتی زندگی ہوتی ہے، جس کا احترام ہم سب پر لازم ہے، چاہئے ہم اسے اچھے سے جانتے ہوں یا نہیں، ہمیں پرسنل اسپیس کا احترام کرنا چاہئے، اور یہی اصول مشہور اور شوبز شخصیات کے لئے بھی ہونا چاہئے، لیکن افسوس ہمارے ہاں یہ تصور اتنا عام نہیں، جس کی حالیہ مثال اداکارہ ہانیہ عامر نے بیان کی کہ کیسے ان کا ایک مداح گھر کے دروازے پر آگیا اور واپسی جانے سے انکار کرتا رہا۔

تفصیلات کے مطابق فلم پردے میں رہنے دو کی کاسٹ نے منگل کو جیو کے عید اسپیشل شو ہنسنا منہ ہے کے پہلے ایپی سوڈ میں بطور مہمان شرکت کی، دوران گفتگو فینز سے متعلق سوال کرتے ہوئے میزبان نے ہانیہ عامر کو مخاطب کرتے ہوئے کہا کہ “فینز کبھی کبھی عجیب بھی ہوجاتے ہیں اور وہ عجیب پیغامات بھیجتے ہیں یا آپ کی پرائیویسی میں مداخلت کرتے ہیں۔ کیا آپ کے ساتھ بھی ایسا کچھ ہوا ہے؟

جس پر ہانیہ عامر نے بتایا کہ کچھ مداح میرے گھر کے باہر آئے لیکن میں گھر پر نہیں تھی، لیکن وہ یہ ماننے کیلئے تیار نہیں تھے، لہذا انہوں نے تین چار گھنٹے میرا انتظار کیا۔ چنانچہ تھوڑی دیر بعد پولیس آگئی اور میرے گھر والوں سے کہا کہ وہ انہیں بتائیں کہ وہ انہیں جانتے ہیںیا نہیں؟ اور دھمکی دی کہ ورنہ وہ انہیں لے جائیں گے، لہذا “میری والدہ نے ان سے بات کی اور پولیس کو بتایا کہ ‘نہیں نہیں، انہیں جانے دو، یہ بچے ہیں’۔

بلاشبہ اداکار یا ادکارہ ہونے کے جہاں ڈھیر سے فوائد ہوتے ہیں وہیں ان کے کچھ منفی اثرات بھی ہوتے ہیں، افسوس کے ہم سے بہت سے لوگ یہ بھول جاتے ہیں کہ مشہور شخصیات بھی ہماری طرح ایک عام انسان ہیں، ان کی بھی نجی زندگی ہے، ذاتی حدود ہے، جس کا یقیناً ہم سب پر احترام لازمی ہے۔

کچھ روز قبل اداکارہ مہوش حیات کے ساتھ بھی ایسا واقعہ پیش آیا جہاں ایک مداح تصویر لینے کے لیے ان کی کمر پر ہاتھ رکھنے لگا تھا لیکن مہوش کے ساتھ کھڑے ان کے دوست نے مداح کا ہاتھ پکڑ کر پیچھے کردیا، جس پر ردعمل دیتے ہوئے مہوش حیات نے اس قسم کے واقعات کے خلاف آواز بلند کی تھی۔ اس واقعے کی ویڈیو انسٹاگرام پر مہوش حیات نے شئیر کی اور اداکارہ نے عقب سے انہیں محفوظ رکھنے پر ریحان صدیقی کا بھرپور شکریہ ادا کیا تھا۔

علاوہ ازیں، چند دنوں پہلے اداکار اُشنا شاہ نے اپنی ایک ٹوئٹ میں عوامی مقامات پر خواتین مداحوں کے بغیر اجازت چھونے پر ناراضی کا اظہار کیا تھا، جس کی حمایت پاوری گرل دنانیر مبین نے بھی کی تھی، اس وقت ناگوار صورتحال کا سامنا کرنا پڑتا ہے جب خواتین بغیر اجازت گلے ملتی ہیں اور پھر کمر پر ہاتھ پھیرتی ہیں، کیا یہ لوگ میری پیمائش لینے کی کوشش کررہی ہوتی ہیں؟ اداکارہ نے مزید کہا کہ یہ انتہائی غیر مناسب ہے، برائے مہربانی اس حوالے سے آگاہی مہم چلانی چاہیے کہ لوگوں کی پرائیویسی کا خیال رکھا کریں، پھر چاہے وہ کوئی سلیبریٹی ہو یا عام شخص۔