پاکستانی طالبہ امریکا کے 21 لاکھ طلبا کی نمائندہ منتخب

پاکستانی طالبہ فزا سید امریکا میں 21 لاکھ طلبا کی نمائندہ بن گئیں۔ امریکی ریاست کیلیفورنیا میں 21 لاکھ طلباء کی نمائندگی کرنے والے 116 کمیونٹی کالجوں کے لئے متحدہ عرب امارت سے تعلق رکھنے والی پاکستانی طالبہ 17 سالہ فضا سید کو طالب علموں کے لئے فنانس کا نائب صدر منتخب کرلیا گیا ہے۔

تفصیلات کے مطابق دبئی میں مقیم 17 سالہ پاکستانی نژاد فضا سید 28 مارچ کو ہونے والے ایک آن لائن سروے میں 10 ووٹوں کی برتری حاصل کرنے کے بعد منتخب ہوئیں ، انہوں نے 76 نمائندوں کی جانب سے اپنے لیے 43 ووٹ حاصل کیے۔ فضا سید کیلیفورنیا کے کپرٹینو میں ڈی انزہ کالج کی طالبہ ہیں اور اس وقت کورونا کے سبب دبئی سے آن لائن تعلیم حاصل کر رہی ہیں۔

اس پاکستانی طالبہ نے جس انتخابات میں کامیابی حاصل کی ہے یہ طلباء کے سینیٹ برائے کیلیفورنیا کمیونٹی کالجز (ایس ایس سی سی سی) کے آن لائن انتخابات تھے جو کہ طلباء کی باڈی ہے جس کے نمائندے کالجز کے بورڈ آف گورنرز میں شامل ہوتے ہیں اور طلباء کی نمائندگی کرتے ہیں۔ علاوہ ازیں، یہ کمیونٹی طلباء کو ریاستی پالیسیاں تشکیل دینے کے سلسلے میں آواز اٹھاتی ہے جس سے طلباءپر نمایاں اثر پڑتا ہے۔

فنانس کا نائب صدر منتخب ہونے کے بعد فضا سید کا مقصد طلباء کی بنیادی ضروریات کے لیے فنڈز بڑھانے کے سلسلے میں اصلاحات نافذ کرنا کے ساتھ ان کے لئے ملازمتوں اور اسکالر شپ کے لئے فنڈز مختص کرنے کے لئے ڈونرز تلاش کرنا بھی ہے۔ اس حوالے سے ان کا کہنا ہے کہ خود کمیونٹی کالج کی طالب علم ہونے کے ناتے مجھے ایسے بہت سارے لوگوں کے حوالے سے تشویش ہے جن کی آواز کہیں بھی سنی نہیں جا رہی، خاص طور پر کورونا کی صورتحال میں ۔لہٰذا میں اس اعزاز کے لیے بے حد ممنون ہوں کہ میں ریاست کی وسیع سطح پر 2.1 ملین سے زیادہ طلباء کی نمائندگی کروں، مسائل کے حل کے ساتھ آؤں اور بنیادی ضروریات کے لیے مالی اعانت بڑھانے کے لیے اصلاحات کو نافذ کروں۔

حال ہی میں بصارت سے محروم ایک پاکستانی طالبہ نے بھی ملک کا نام روشن کردیا۔ پاکستانی طالبہ خنسہ ماریہ جو کہ قطر میں امریکا کی جارج ٹاؤن یونیورسٹی کیمپس کی طالبہ ہیں، ان کو یہ اعزاز حاصل ہوا ہے کہ وہ آکسفورڈ یونیورسٹی میں پاکستان سے “رہوڈاسکالر” کے لئے منتخب ہوئی ہیں۔