اپنی زمین سے محروم دنیا کی چار قومیں کونسی ہیں؟

کیا آپ جانتے ہیں کہ دنیا میں چار ایسی قومیں ہیں جو “اسٹیٹ لیس”ہیں ، یعنی یہ وہ لوگ ہیں جن کی اپنی کوئی ریاست نہیں بلکہ یہ دنیا میں مہاجرین کی طرح زندگی بسر کررہے ہیں۔

کُرد

یہ کرد کون ہیں اور کہاں سے آئے ہیں؟ ایک تخمینہ کے مطابق دو سے تین کڑوڑ آبادی پر مشتمل یہ کرد ترکی ،ایران، عراق اور شام میں بستے ہیں اور ان کی اپنی کوئی ریاست نہیں۔ دور قدیم سے ان کے آباؤ اجداد چرواہے کا کام کرتے رہے ہیں اور یہ لوگ خانہ بدوشوں کی زندگی بسر کرتے آئے ہیں۔ مختلف ممالک میں آباد کرد دنیا میں ایک منفرد معاشرہ کی حیثیت رکھتے ہیں، یہ مختلف ثقافت ،رسم و رواج اور مذاہب کو ماننے والے ہیں لیکن ان کی اکثریت مسلمان ہیں۔ پہلی جنگ عظیم سے قبل اقلیت کے طور پر زندگی گزارنے والی کرد قوم نے الگ ریاست کے قیام کی کوششیں کیں جو ناکام رہی۔تاہم جنگ عظیم کے بعد مغربی اتحادیوں نے دوبارہ “کردستان” بنانے کے منصوبے تیار کئیے ، لیکن سلطنت عثمانیہ کے ختم ہونے کے بعد جب معاہدے کے تحت ریاستوں کی حدود بندی کی گئی اور ترکی کے لئے سرحدیں کھینچیں گئیں تو کردستان کو ختم کردیا گیا۔اس کے بعد آٹھ دہائیوں تک کرد مختلف ممالک میں اقلیت کے طور پر زندگی بسر کرتے رہے۔

روہنگیا

بنگلہدیش میں کٹوپلونگ پناہ گزین کیمپ دنیا میں اپنی نوعیت کا سب سے بڑا کیمپ ہے ، یہاں پڑوسی میانمار (سابقہ ​​برما) کے چھ لاکھ سے زیادہ روہنگیا مسلمان پناہ گزین ہیں۔ اقوام متحدہ نے روہنگیا کو دنیا کی سب سے زیادہ “مظلوم اقلیت” قرار دیا ہے۔
ابھی تک یہ بات واضح نہیں ہے کہ روہنگیا مسلمان میانمار میں کتنے عرصے سے مقیم ہیں، بدھ مت کی اکثریت کی اس ریاست میں روہنگیا مسلمان پچھلی کئی دہائیوں سے ظلم وستم اور بربریت سہتے آرہے ہیں۔اب تک تقر یباً23 ہزار مسلمان بے گھر ہو چکے ہیں اور 3 لاکھ وطن چھوڑ کر مہاجرین کی زندگی گزرنے پر مجبور ہیں تاہم ابھی تک ان مسلمانوں کو ظلم سے نجات دلوانے کیلئے کسی بھی مسلم ریاست کی طرف سے کوئی غزنوی للکار سامنے نہیں آئی ہے ۔

روما

روما خانہ بدوش شمالی ہندوستان سے آٹھویں اور دسویں صدی کے درمیان یورپ میں داخل ہو ئے۔یہ اقلیت الگ الگ گروہوں پر مشتمل ہے جسے “قبائل” یا “اقوام” کہتے ہیں۔ان کے پسِ منظر کا جائزہ لیں تو یہ لوگ کاریگر اور فنون لطیفہ سے تعلق ر کھنے والے ہیں۔ جبکہ صدیوں سے اس قوم کو یورپی ممالک میں تذلیل کاسامناہے کیونکہ انہیں اچھوت مانا جاتا ہے،اس لئے یہ لوگ یورپ میں نسلی جبر کا شکار ہیں ۔تاریخ یہ بتاتی ہے کہ گزشتہ کئی دہائیوں سے روما کے خاندان نسل در نسل مختلف یورپی ممالک میں جلاوطنی کی زندگی گزاررہےکیونکہ کوئی بھی یورپی ملک انہیں شہریت نہیں دیتی۔

تھائی لینڈ میں مختلف اقلیتیں

تھائی لینڈ میں ہمونگ ، کیرن اور دیگر نسلی اقلیتیں آباد ہیں۔ لیکن دیگر ممالک کے برعکس تھائی لینڈ اپنی ان اقلیتوں کو شہریت دینے کے لئے سنجیدہ کوششیں کررہا ہے۔ حکومت نے2017 کی ایک قرارداد منظور ہوئی جس کے تحت 80 ہزاربے ریاست لوگوں جن میں زیادہ تر تارکین وطن اور پناہ گزین شامل ہیں کو شہریت مل سکے گی۔