ثمینہ بیگ ‘کے ٹو’ سر کرنے والی پہلی پاکستانی خاتون کوہ پیما بن گئیں

کوہ پیماؤں کےلیے کے ٹو کا شمار دنیا کے مشکل ترین پہاڑوں میں ہوتا ہے۔ یہ دنیا کی دوسری بلند ترین پہاڑی چوٹی ہے۔ اس کی بلندی سطح سمندر سے 8611 میٹر ہے۔ پاکستانی کوہ پیما ثمینہ بیگ نے دنیا کی دوسری بلند ترین چوٹی کے ٹو سر کرلی ہے اور وہ یہ اعزاز حاصل کرنے والی پہلی پاکستانی خاتون کوہ پیما بن گئی ہیں۔

ثمینہ بیگ نے یہ اعزاز اپنی 6 رکنی ٹیم کے ساتھ حاصل کیا ہے، ان کے بھائی محبوب علی کا کہنا ہے کہ ثمینہ بیگ نے یہ اعزاز جمعے کی صبح تقریباً ساڑھے 7 بجے حاصل کیا ہے۔ اس موقع پر انہوں نے کہا کہ وہ خود کو خوش قسمت سمجھتی ہیں کہ انہیں کے ٹو کے اوپر کھڑے ہونے کا موقع ملا۔ وہ پاکستانی ٹیم کی قیادت کر رہی تھیں۔ چوٹی پر پاکستانی جھنڈا لگانے کے بعد اب وہ واپسی کے راستے کی جانب گامزن ہیں۔

رپورٹس کے مطابق پاکستانی خواتین کوہ پیما نائلہ کیانی کی بھی کے ٹو سر کرنے کے لیے پیش قدمی جاری ہے۔ کے ٹو سر کرنے کی اس کوشش میں ایران، قطر، عمان سمیت کئی ملکوں کی خواتین بھی شامل ہیں۔

وزیراعظم شہباز شریف نے کے ٹو سر کرنے والی پاکستان کی پہلی خاتون کوہ پیما ثمینہ بیگ اور اہلخانہ کو مبارکباد دیتے ہوئے کہا کہ ثمینہ بیگ پاکستانی خواتین کے عزم و ہمت اور بہادری کی علامت بن کر ابھری ہیں، ثمینہ بیگ نے ثابت کیا کہ پاکستانی خواتین کوہ پیمائی کے صبر آزما کھیل میں مردوں سے پیچھے نہیں، امید ہے ثمینہ بیگ دنیا بھر میں پاکستان کا پرچم اسی جذبے سے لہراتی رہیں گی۔

ہنزہ کے گاؤں شمشال سے تعلق رکھنے والی ثمینہ بیگ نے 2013 میں محض 21 سال کی عمر میں 8 ہزار 849 میٹر بلند ’ماؤنٹ ایورسٹ‘ سر کیا تھا، وہ واحد پاکستانی خاتون ہیں جنہوں نے کم عمری میں یہ کارنامہ سرانجام دیا تھا۔اس کے بعد مہم جوئی کا یہ سلسلہ چلتا رہا۔وہ 2015 اور 2021 میں بھی کے ٹو سر کرنے کی کوشش کرچکی ہیں مگر موسمی حالات اور حادثات کی وجہ سے انہیں ان سمٹ کو ادھورا چھوڑنا پڑا تھا۔

ثمینہ بیگ 2013 میں دنیا کی بلند ترین چوٹی ماؤنٹ ایوریسٹ سر کرنے والی پہلی پاکستانی خاتون بنی تھیں۔ اس سے قبل بھی ثمینہ بیگ کی سربراہی میں خواتین کوہ پیماؤں نے 5600 میٹرز برفیلی چوٹی سر کی جہاں درجہ حرارت منفی چالیس کے قریب تھا۔

خیال رہے کہ ثمینہ بیگ اور نائلہ کیانی نے گذشتہ دنوں کے ٹو کو فتح کرنے کی اپنی اپنی مہم کا آغاز کیا تھا، دونوں خواتین کوہ پیما اس مہم جوئی کے لیے کافی عرصے سے تیاری کررہی تھیں۔
ثمینہ بیگ کی طرح نائلہ کیانی بھی کئی کو پیمائی میں کئی ریکارڈ بناچکی ہیں، گزشتہ سال انہوں نے 8 ہزار 35 میٹر بلند گیشر برم ٹو سر کرکے پاکستان کے اندر 8 ہزار میٹر سے بلند کسی بھی چوٹی کو سر کرنے والی پہلی پاکستانی خاتون ہونے کا اعزاز حاصل کیا تھا۔ اس کے علاوہ انہوں نے گیشربرم ٹو چوٹی سرکی جبکہ وہ 8 ہزار میٹرز بلند چوٹی سرکرنے والی پہلی پاکستانی خاتون بھی ہیں۔