لینڈ کروزر چلانے والا کم عمر ڈرائیور کون ہے ؟

گذشتہ دنوں سوشل میڈیا پر ایک ویڈیو وائرل ہوئی جس میں ایک کم عمر بچہ لینڈ کروزر چلاتے دیکھا گیا تھا۔ بچہ اس قدر چھوٹا تھا کہ وہ اسٹیئرنگ نشست پر بیٹھ کر گاڑی نہیں چلا سکتا تھا لہذا وہ اسٹیئرنگ اور ڈرائیور کی نشست کے درمیان پیڈل پر کھڑا ہو کر گاڑی چلا رہا تھا۔ واقعے کی ویڈیو سوشل میڈیا پر منظر عام آنے کے بعد بہت سے سوالوں نے جنم لیا، وہ بچہ کون تھا جو لینڈ کروزر چلا رہا تھا؟ وہ اتنی بڑی گاڑی لے کر سڑک پر کیسے آیا؟ اس دوران ٹریفک پولیس کے اہلکاروں نے اس بچے کو ملتان کی ایک مصروف شاہراہ پر گاڑی چلانے سے کیوں نہیں روکا؟

جس دن سے یہ ویڈیو سوشل میڈیا پر وائرل ہوئی یہ واقعہ ایک معمہ بنا ہوا تھا، گاڑی چلاتے والے اس بچے اور اس کے والدین کی تلاش کے لیے پولیس کی دو ٹیمیں تشکیل دی گئیں تھیں تاہم اس واقعے کا ڈراپ سین اس وقت ہوا جب گاڑی کے مالک نے اپنے کم عمر بیٹے کے ساتھ خود کو پولیس کے حوالے کر دیا۔ تفصیلات کے مطابق گاڑی کے مالک اور کم عمر ڈرائیور کے والد مظہر عباس نے پولیس کو بتایا کہ ان کی غیر موجودگی میں ان کا بیٹا بغیر اجازت گاڑی لے کرگھر سے نکل گیا تھااور گھر کے افراد اس کی اس حرکت سے لاعلم تھے۔

  پولیس نے قانونی کارروائی کرتے ہوئے گاڑی کوضبط کر لیا اور موٹروہیکل آرڈیننس کے تحت لینڈ کروزر کے کم عمر ڈرائیور کے والد کے خلاف مقدمہ درج کر لیا۔ تاہم پولیس نے کم عمر ڈرائیور اور اس کے والد کو ایک ہزار روپے کا معمولی جرمانہ ادا کرنے کے بعد گھر جانے کی اجازت دے دی۔

اس کے ساتھ ہی بچے کے والد نے پولیس کو حلف نامہ جمع کرایا۔ جس میں تحریر تھا کہ واقعہ ان کی لاپرواہی کی وجہ سے پیش آیا اور آئندہ ایسا نہیں ہو گا۔

 وقت گزرنے کے ساتھ ساتھ ہمارے معاشرے میں کم عمر بچوں کا گاڑی چلانا عام سی بات بنتی جا رہی ہے ۔اکثر یہ بات سامنے آتی ہے کہ کہیں کم عمر ڈرائیور تیز رفتاری سے موٹرسائیکل چلا رہا ہے تو کہیں ٖلاپرواہی سے گاڑی چلا رہا ہے ۔ اس صورت حال کی ذمہ داری جہاں بچوں پر عائد ہوتی ہے وہیں والدین کو بھی بری الذمہ نہیں کیا جا سکتا کیونکہ یہ ان کی ذمہ داری ہے کہ اپنے بچوں کو کم عمری میں گاڑی چلانے سے روکیں۔