خلیل الرحمان قمر نے صدف کنول کے شوہر سے متعلق بیان کی حمایت کردی

مشہور ومعروف مصنف اور ڈرامہ نگار خلیل الرحمان قمر شوہر سے متعلق بیان پر ماڈل صدف کنول کی حمایت میں سامنے آگئے، کہتے ہیں انہوں نے بہروز سبزواری کو فون کرکے اتنی خوبصورت سوچ پر صدف کنول کو مبارکباد پیش کی۔

تفصیلات کے مطابق پچھلے کچھ دنوں سے اداکارہ صدف کنول اور اداکار شہروز سبزواری کے ایک انٹریو کی ویڈیو سوشل میڈیا پر بےحد وائرل ہے، جس میں اے آر وائی نیوز کے پروگرام ہمارے مہمان میں میزبان فضہ شعیب سے بات کرتے ہوئے اداکارہ صدف کنول نے فیمنزم اور شوہر سے متعلق ایک بیان دیا، جس نے الیکڑانک اور سوشل میڈیا پر ایک نئی بحث کا آغاز کر دیا تھا۔

اس سلسلے میں کچھ لوگوں نے جہاں اداکارہ کے بیان خوب سراہا، تو کئی نامور شخصیت سمیت کئی لوگوں نے انہیں شدید تنقید کا نشانہ بھی بنایا۔ تاہم ان کی حمایت میں اب مشہور مصنف خلیل الرحمان قمر بھی سامنے آگئی، اس موضوع پر بات کرتے ہوئے ان کی ایک انٹرویو کی ویڈیو سوشل میڈیا پر خوب وائرل ہورہی ہے۔

خلیل الرحمان قمر کا کہنا تھا کہ جب صدف کنول نے دوران انٹرویو یہ بات کی تو میں نے شہروز سبزواری کے والد بہروز سبزواری کو فون کیا اور مبارکباد دیتے ہوئے کہا کہ صدف کو میری طرف سے پیار دینا اور مبارکباد بھی دینا کیوں کہ صدف نے بہت خوبصورت بات کہی ہے۔

ان کا مزید کہنا تھا کہ اس ہی شام مجھے ایک چینل پر بیپر کے لئے بلایا گیا، تو ایک خاتون نے ماڈل صدف کنول کے بیان کو اس طرح بیان کیا، جیسے انہوں نے کوئی جرم کیا ہو۔

خلیل الرحمان قمر کا کہنا تھا کہ بیٹی کو یہ یاد رکھنا کہ یہ میرے باپ کا جوتا ہے، وہ اسے ملزمہ بنا دیتا ہے؟ یا بیوی کا یہ یاد رکھنا کہ یہ میرے شوہر کی شرٹ ہے اور ضرورت پڑنے پر بیوی وہ شرٹ اپنے شوہر کو لاکر دیتی ہے، یا شوہر کی کوئی ذمہ داری پوری کردیتی ہے، تو کیا اس سے وہ اپنے شوہر کی ملازمہ ہوجاتی ہے؟

ڈرامہ نگار خلیل الرحمان قمر کے مطابق جب کوئی مرد جب کسی عورت سے شادی کرتا ہے، تو اس کی خواہش ہوتی ہے کہ وہ اسے ملکہ کی طرح رکھے، انہوں نے اپنی شادی شدہ زندگی کی مثال دیتے ہوئے کہا کہ ایک زمانہ تھا، جب میں نے بھی اپنی بیوی کے ساتھ جھاڑو دی، برتن دھوئے، آج بھی اکثر اپنا ناشتہ خود بناتا ہوں، اس کی دالیں چنیں ہیں، میری بیوی میرے موزے نکالے گی اور جب ضرورت پڑے گی، میں بھی اس کے موزے نکالوں گا۔ کیوں یہ کام کرنے سے کسی کا مرد یا عورت ہونا واضح نہیں ہوتا ہے، زندگی اس ہی طرح چلتی اور یہ محبت ہے۔

مزید پڑھیں: خلیل الرحمان قمر خاتون سماجی کارکن پر برس پڑے

ویڈیو پیغام کے آخر میں انہوں نے کہا کہ بجائے اس کے ہم محبت پھیلنے دیں، اور اس کو رشتے کو بیان کردیں، ہم اسے ایک کنٹریکچوئل کیپسٹی کی طرف لیکر جارہے ہیں۔

واضح رہے چند روز قبل ماڈل سبیکا امام نے صدف کنول کے بیان پر ردعمل دیتے ہوئے موقف اپنایا تھا کہ کپڑے استری کرنے یا جوتے اٹھانے میں کوئی برائی نہیں ہے، ہر انسان کا پیار کرنے کا انداز اور خیال رکھنے کے طریقے اپنے اپنے ہوتے ہیں، وہ آپ اس کی اچھائی سمجھیں یا اس کا پیار لیکن ایک عورت کی دنیا یہاں شروع ہوکر یہاں ختم نہیں ہوتی ہے۔ جیسا کہ مسس سبزواری کی جانب سے بتایا گیا ہے۔