پاکستان پر تنقید کنگنا رناوٹ کو مہنگی پڑگئی

پاکستان کی عزت ہمارے لئے مقدم ہے کوئی اس پر میلی آنکھ ڈالے، اس کی ساکھ کو نقصان پہنچائے یا تنقید کا نشانہ بنائے یہ ہمیں بالکل برداشت نہیں، لیکن پڑوسی ملک کے میڈیا کا کیا کریں جو اپنی عادت سے مجبور مختلف ہتکھنڈوں سے پاکستان کا مذاق اڑانے سے باز ہی نہیں آتا اور ہر بار منہ کی کھانے کے بعد بھی سکون سے نہیں بیٹھتا۔

اب تو اس مقصد کیلئے سوشل میڈیا کا بھی خوب فائدہ اٹھایا جارہا ہے۔ اپنے شعلہ باز بیان بازی کے لئے بھارتی اداکارہ کنگنارناوٹ کسی طور پیچھے نہیں اور پاکستان مخالف بیان دینے میں سر فہرست ہیں ۔ وہ پاکستان پر تبصرے کا کوئی موقع ہاتھ سے جانے نہیں دیتیں بلکہ سوشل میڈیا پر مسلسل پاکستان پر تنقید کرتی نظر آتی ہیں۔ درحقیقت ان کی یہ سوچ دونوں ممالک کے مابین سیاسی اختلافات کو بھڑکنے کا کام کرتی نظر آتی ہے ۔

لیکن اس بار کنگنا کے ساتھ معاملہ کچھ اُلٹا ہو گیا بلکہ پاکستان پر تنقید کرنا ان کو مہنگا پڑ گیا، یا یوں کہہ لیں کہ ان کو لینے کے دینے پڑ گئے کیونکہ اس بار ان کے تبصرے پر منیب بٹ اور مومنہ مستحسن نے پاکستان کا مکمل دفاع کیا اور ان کی تنقید کا بھرپور انداز سے جواب دے کر انہیں چپ کروادیا۔

ہوا کچھ یوں کہ کنگنا رناوٹ نے بھارتی فلم سڑک 2 کے تازہ ترین ٹریلر 2 کے بارے میں ٹوئیٹر پرتذکرہ کرتے ہو ئے کہا کہ لفظ” گرو “کو حقیقت میں”مولوی “سے تبدیل کردینا چاہئیے کیونکہ پاکستان ہی ہندوستان میں مذہبی تعصبانہ سوچ پھیلانے کا ذمہ دار ہے۔

ان کے اس بیان پر منیب بٹ نے ان کو اچھا سبق سکھایا اور کہا کہ آپ کا منفی پروپیگینڈا کرنے والا میڈیا درحقیقت آپ کی ذہنیت کی عکاسی کرتا نظر آتا ہے، اس موقعے پر منیب نے کنگنا کو بھارتی پائلٹ ابھینندن کا قصے کا حوالہ دیتے ہوئے یہ بھی کہا کہ اگر پاکستان سے اتنا ہی مسئلہ ہے تو اپنا پائلٹ بھیجیں چائے تیار ہے۔

منیب بٹ کے اس زوردار بیان کے بعد مومنہ نے صورتحال کا فائدہ اٹھاتے ہوئے کنگنا کو منہ توڑ جواب دیتے ہوئے کہا کہ آپ کی طرف سے ہر اختلاف میں پاکستان کو کیوں گھسیٹا جاتا ہے؟ کیوں آپ ہر بار پاکستان کو موضوع بحث بناکر اپنے اندرونی معاملات کو پس پشت ڈال دیتے ہیں اور ان کے حل پر نظرثانی نہیں کرتے۔

مزید جانئے: پاپ گلوکارہ نازیہ حسن کو مداحوں سے بیچھڑے 20 برس گزر گئے

مومنہ کے اس بیان نے کنگنا کو لاجواب کردیا۔ اداکار چاہے سرحد کے اس پار ہو یا پھر اُس پار وہ ملک کا سفیر ہوتا ہے اور وہ اپنے ملکی خیالات کی قومی اور بین الاقوامی سطح پر ترجمانی کرتا ہے۔ لیکن تعجب کی بات یہ ہے کہ کنگنا سوشل میڈیا پر کبھی بھی پاکستان کے بارے میں غیر جانبدارانہ بات کرتی نظر نہیں آتیں اور ان کے بیانات پاکستان مخالف ہوتے ہیں چنانچہ پاکستانیوں کیلئے یہ بات سمجھ سے بالاتر ہے کہ آخر کب تک کنگنا بھارتی میڈیا کے منفی پروپیگنڈے پر بھروسہ کرکے اس طرح کی بیان بازی سے اپنے پاکستانی مداحوں کی دل آزاری کرتی رہیں گی۔