ہندوستانی لڑکی “گیتا” 5 سال بعد اہلخانہ سے جا ملی

قوت سماعت اور گویائی سے محروم لڑکی گیتا ، جو بچپن میں غلطی سے سرحد پار کرکے پاکستان پہنچ گئی تھی بالآخر اپنے گھر والوں سے جا ملی۔ گیتا کو سنہ 2015 میں 12 سال بعد بھارت واپس بھیج دیا گیا تھا ۔ اس دوران گیتا پاکستان میں ایدھی سنٹر کے ساتھ رابطے میں بھی رہی ، اور اب بالآخر ہندوستان واپسی کے پانچ سال سے زیادہ عرصہ گزر جانے کے بعد اپنے گھر والوں سے جا ملی۔

دس یا گیارہ سال کی عمر میں گیتا غلطی سے سرحد عبور کرکے پاکستان پہنچ گئی تھی۔ اسے گمشدہ بچی کے طور پر ایدھی سنٹر لایا گیا تھا۔ تب سے بلقیس ایدھی اس کی دیکھ بھال کر رہی تھیں۔ پہلے تو بلقیس ایدھی نے اس کا نام فاطمہ رکھا تھا لیکن پھر اس کے پاؤں چھونے وغیرہ کے انداز کو دیکھ کر انہوں نے محسوس کیا کہ وہ ہندو ہے۔

پھر وہ اسے پوجا کے لئے ایم اے جناح روڈ پر واقع شری سوامیار نارین مندر بھی لے جایا کرتی تھیں۔ لیکن پھر لوگوں کی جانب سے غیر معمولی توجہ ملنے کے بعد بلقیس ایدھی نے اس سے کہا کہ وہ ہندی دیوتا کے کچھ پوسٹر اور مجسمے خریدیں تاکہ وہ گھر میں مندر بنا کر رازداری میں پوجا کرسکے۔

پھر 2015 میں گیتا کی کہانی میڈیا میں مشہور ہوگئی تھی ،چنانچہ ہندوستانی وزیر خارجہ سشما سوراج کے ذریعہ گیتا کو گھر واپس بھیجنے کے انتظامات کیے گئے تھے۔ تاہم ، ہندوستان واپس پہنچنے کے بعد بھی ، اس کے اہل خانہ کی تلاش جاری رہی۔ ابتدائی دو سالوں میں گیتا ان سے نہیں مل سکی۔

یہاں تک کہ بھارت میں حکومت اور این جی اوز نے اس تلاش کے دوران کئی لوگوں کا ڈی این اے ٹیسٹ بھی کروایا لیکن ٹیسٹ میچ نہیں ہوئے۔ خود گیتا کو بھی ان کے بارے میں یقین نہیں تھا۔ اور پھر آخر گیتا نے اپنی ماں کو پہچان لیا۔ جب بلقیس ایدھی سے رابطہ ہوا ، گیتا نے خوشی کے آنسوؤں کے ساتھ اپنی ماں کی تلاش کے بارے میں انہیں بتایا۔ اس کی والدہ بھارتی ریاست مہاراشٹر کے نائگاؤں گاؤں میں رہتی ہیں۔ ان کے ذریعے گیتا کو پتہ چلا ہے کہ اس کا اصل نام رادھا واگمارے ہے۔ جبکہ اس کے اصل والد سدھاکر کا کچھ سال قبل انتقال ہوگیا تھا۔ اسی دوران اس کی والدہ نے دوبارہ شادی کرلی تھی۔

بلقیس ایدھی نے کہا کہ وہ صرف اس بات پر خوش ہیں کہ گیتا جو ان کی بیٹی کی طرح تھی آخر کار اپنے حقیقی خاندان کے ساتھ دوبارہ مل گئی۔انہوں نے مزید کہا ’’اپنے گھر والوں سے اتنے عرصے تک کھو جانا اور خاص طور پر گیتا جیسے کسی کے لئے انتہائی مشکل ہے۔ شاید وہ اب کسی دوسرے ملک میں رہ رہی ہو۔ لیکن وہ اب بھی ہماری بیٹی ہے۔ وہ اب بھی ہمارے درمیان جسمانی فاصلے کے باوجود اپنی ساری خوشیاں اور غم میرے ساتھ بانٹتی ہے۔ اور جو بھی فیصلہ وہ خود کے لیے لے گی میں اس کے ساتھ رہوں گی ‘‘۔