بالی ووڈ اداکارہ کنگنا رناوت کا بچپن میں جنسی ہراساں ہونے کا انکشاف

معروف بولی ووڈ اداکارہ اور کامیڈی رائیلٹی شو لاک اپ کی میزبان کنگنا رناوٹ نے اتوار کی نشر کردہ قسط میں انکشاف کیا کہ انہیں بچپن میں جنسی ہراسانی کا سامنا کرنا پڑا تھا۔

تفصیلات کے مطابق نامور بھارتی اسٹینڈ اپ کامیڈین اور ریپر منور فاروقی نے پروگرام کے ایک سیگمنٹ کے دوران بچپن میں جنسی ہراسانی کا سامنا کرنے کے واقعے کو یاد کیا، بعدازاں اداکارہ کنگنا رناوٹ نے بھی اپنے بچپن میں اس ہی طرز کے واقعے کی نشاندہی کی اور افسوسناک واقعے کی خوفناک تفصیلات بیان کیں۔

کامیڈین منور فاروقی کا کہنا تھا کہ میں 6 یا 7 برس کا تھا، جب مجھے جنسی طور ہراساں کیا گیا، یہ سلسلہ کئی برسوں تک جاری رہا، اس وقت تک جب میں 11 سال کا لڑکا نہیں ہوگیا تھا، ہراساں کرنے والوں میں 2 افراد میرے رشتہ دار تھے، میں اس وقت یہ چیز نہیں سمجھا تھا، کیونکہ ہم سب قریبی رشتہ دار تھے۔

منور فاروقی کا مزید کہنا تھا کہ ایک بار جب یہ سب کچھ انتہاء سے زیادہ بڑھ گیا، تو مجھے اندازہ ہوا کہ یہ سب کچھ رکنا چاہئے، میں نے یہ کچھ کبھی بھی کسی کے ساتھ شئیر نہیں کیا ہے، کیونکہ مجھے ان کا سامنا کرنا ہے اور انہیں اپنی فیملی کا سامنا کرنا ہے۔ میں نے ایک بار محسوس ہوا کہ شاید میرے والد کو علم ہوگیا ہے، لیکن انہوں نے مجھے بہت ڈانٹا۔ شاید انہوں نے بھی یہی محسوس کیا، جیسا میں نے محسوس کیا تھا، یہ ایسی چیز نہیں ہے، جو کھلے عام سامنے آنی چاہیے۔

ایک پبلک پلیٹ فارم پر اپنا تجربہ شئیر کرنے پر منور فاروقی کی تعریف کرتے ہوئے اداکارہ کنگنا رناوت نے اپنا تجربہ شیئر کیا کہ “ہر سال بہت سارے بچے اس سے گزرتے ہیں لیکن ہم پبلک پلیٹ فارم پر اس کے بارے میں بات کرنے سے گریز کرتے ہیں۔ ہم سب اس سے گزرتے ہیں، ہم سب کو کسی نہ کسی موقع پر نامناسب طور پر چھوا گیا ہے”۔

اداکارہ کنگنا رناوت نے انکشاف کیا کہ میں نے بھی بچپن میں اس طرح کی چیزوں کا سامنا کیا ہے، ہمارے محلے کا ایک نوجوان مجھے نامناسب انداز میں چھوتا تھا، وہ لڑکا مجھ سے تین چار سال بڑا تھا، شاید وہ اپنی جنسیت کو تلاش کر رہا تھا۔ اس وقت میں نہیں جانتی تھی کہ اس کا کیا مطلب ہے، اس سے کوئی فرق نہیں پڑتا ہے کہ آپ کا خاندان کتنا ہی محفوظ ہے، تمام بچے اس سے گزرتے ہیں۔

اس موقع پر اداکارہ کنگنا رناوٹ نے مزید کہا کہ حیران کن بات یہ ہے کہ جنسی ہراسانی کا شکار ہونے کے بعد آپ کو ہی اس کا مجرم بنادیا جاتا ہے، یہ ہمارے معاشرے میں بچوں کے لیے ایک بہت بڑا مسئلہ ہے۔ جنسی ہراسانی کا شکار بچے نفسیاتی طور پر صدمے کا شکار ہوتے ہیں ، انہیں زندگی میں لاتعداد پریشانیوں کا سامنا کرنا پڑتا ہے۔

مزید پڑھیں: گھر کا ملازم 14 دن تک جنسی طور پر ہراساں کرتا رہا، فریحہ الطاف

اس دوران کنگنا رناوت نے کامیڈین منور فاروقی کی خوب پذیرائی کی، کہ انہوں نے اس پلیٹ فارم کے ذریعے انتہائی بہادری کے ساتھ اپنے ساتھ پیش آنے والے واقعے کو بیان کیا۔

واضح رہے جنسی ہراسانی افسوس کے ساتھ ہمارے معاشرے کی ایک تلخ حقیقت ہے، یہ ایک ذہنی بیماری ہے، جو انسان کو درندگی کی جانب گامزن کردیتا یے، جبکہ معصوم بچے شرم اور ڈر کی وجہ سے اہلخانہ سے یہ باتیں چھپا دیتے ہیں، لہذا والدین اور گھر کے بڑوں کو چاہے اگر کبھی بچے اس طرح کی شکایت کریں تو فوراً ملزمان کے خلاف پولیس کارروائی کریں۔